អង្គការឃ្លាំមើលសង្គ្រាមមួយបាននិយាយថា យានដ្រូន និងរ៉ូកែតរបស់អ៊ីរ៉ង់ដែលសង្ស័យ បានវាយប្រហារមូលដ្ឋានកងទ័ពសហរដ្ឋអាមេរិកនៅភាគឦសានប្រទេសស៊ីរីកាលពីថ្ងៃអាទិត្យ បណ្តាលឱ្យមានការបំផ្លាញធ្ងន់ធ្ងរ ប៉ុន្តែពុំមានអ្នកស្លាប់ និងរបួសទេ។

អង្គការឃ្លាំមើលសិទ្ធិមនុស្សស៊ីរីមានមូលដ្ឋាននៅចក្រភពអង់គ្លេសនិយាយថា រ៉ូកែតមួយគ្រាប់បានវាយប្រហារមូលដ្ឋាន Qasrak ក្នុងខេត្ត Hasakah ក្រោយមកមានការវាយប្រហារដោយយានដ្រូននៅពាក់កណ្តាលអធ្រាត្រ និងពេលព្រឹកព្រលឹម។ អង្គការនេះនិយាយថា ប្រព័ន្ធការពារដែនអាកាសរបស់សហរដ្ឋអាមេរិក បានស្ទាក់ចាប់យានដ្រូនជាច្រើនគ្រឿង ខណៈគ្រាប់ផ្លោងផ្សេងទៀតបានវាយប្រហារចំទីតាំង បណ្តាលឱ្យខូចខាត។

អង្គការឃ្លាំមើលនិយាយថា មូលដ្ឋាន Kharab al-Jir ក៏ត្រូវបានវាយប្រហារដោយរ៉ូកែតជាច្រើនគ្រាប់កាលពីថ្ងៃអាទិត្យ ខណៈមួយចំនួនត្រូវបានស្ទាក់ចាប់ និងខ្លះទៀតបានទៅដល់គោលដៅរបស់វា ដោយគ្មានរបាយការណ៍ភ្លាមៗអំពីអ្នកស្លាប់ និងរបួសនោះទេ។ អង្គការនេះបាននិយាយបន្ថែមថា យានដ្រូនពីរគ្រឿង ត្រូវបានបាញ់ទម្លាក់នៅជិតតំបន់លំនៅឋាន។ ការវាយប្រហារ បានជំរុញឱ្យមានការប្រុងប្រយ័ត្នខ្ពស់ និងសកម្មភាពតាមអាកាសកើនឡើង។

កាលពីថ្ងៃទី២៨ ខែកុម្ភៈ អ៊ីស្រាអែល និងសហរដ្ឋអាមេរិក បានបើកការវាយប្រហាររួមគ្នាលើទីក្រុងតេអេរ៉ង់ និងទីក្រុងរបស់អ៊ីរ៉ង់ជាច្រើនទៀត ដោយបានសម្លាប់មេដឹកនាំកំពូលរបស់អ៊ីរ៉ង់ លោក Ali Khamenei រួមជាមួយមេបញ្ជាការយោធាជាន់ខ្ពស់ និងជនស៊ីវិល។ អ៊ីរ៉ង់ បានឆ្លើយតបវិញដោយការវាយប្រហារដោយមីស៊ីល និងយានដ្រូន កំណត់គោលដៅលើមូលដ្ឋានទ័ព និងមូលដ្ឋានផ្សេងៗទៀតរបស់អ៊ីស្រាអែល និងសហរដ្ឋអាមេរិក នៅមជ្ឈិមបូព៌ា។