ដោយដកស្រង់សម្តីរបស់សេវាសន្តិសុខ FSB ប្រព័ន្ធផ្សព្វផ្សាយរដ្ឋរុស្ស៊ីបានចុះផ្សាយនៅថ្ងៃចន្ទនេះ 

ថា រុស្ស៊ីបានបញ្ជាឲ្យអ្នកការទូតម្នាក់នៅស្ថានទូតអង់គ្លេសប្រចាំទីក្រុងមូស្គូចាកចេញពីប្រទេសនេះ ជុំវិញការប្រកាន់ថា លោកធ្វើការជាចារកម្ម។  

ទីភ្នាក់ងារសារព័ត៌មាន RIA រដ្ឋបានរាយការណ៍ថា អ្នកការទូតរូបនេះ ដែល FSB បានបញ្ជាក់ថា ជាឯកអគ្គរដ្ឋទូតលោក Albertus Gerhardus Janse Van Rensburg ត្រូវបានចោទប្រកាន់ថា បានចូលរួមក្នុង «សកម្មភាពចារកម្មបំផ្លិចបំផ្លាញ ដែលគំរាមកំហែងដល់សន្តិសុខរបស់រុស្ស៊ី»។

RIA បានដកស្រង់សម្តីរបស់ FSB ដែលបាននិយាយថា៖«ការសម្រេចមួយ ត្រូវបានធ្វើឡើង ដើម្បីដកហូតលិខិតទទួលស្គាល់របស់លោក Janse Van Rensburg និងបញ្ជាឲ្យលោកចាកចេញពីប្រទេសរុស្ស៊ី ក្នុងរយៈពេលពីរសប្តាហ៍»៕