ក្នុងសេចក្តីថ្លែងការណ៍មួយ នាព្រឹកថ្ងៃចន្ទ (ទី៣០ ខែមីនា ឆ្នាំ២០២៦) នេះ អ្នកនាំពាក្យមួយរូបរបស់សភា Knesset បាននិយាយថា សភាអ៊ីស្រាអែលបានអនុម័តថវិការដ្ឋឆ្នាំ២០២៦ ដែលអនុញ្ញាតឲ្យរដ្ឋាភិបាលរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ទប់ស្កាត់មិនឲ្យមានការបោះឆ្នោតមុនអាណត្តិ ខណៈសង្គ្រាមរួមគ្នារបស់ប្រទេសលោកជាមួយសហរដ្ឋអាមេរិកលើអ៊ីរ៉ង់ កំពុងបន្តមាន។

ការអនុម័តថវិកាការពារជាតិចំនួន ៦៩៩ពាន់លានសេកែល (ប្រមាណជា ២២២ពាន់លានដុល្លារ) កើតឡើងមួយខែនៃសង្គ្រាមដែលអ៊ីស្រាអែលក៏កំពុងប្រយុទ្ធជាមួយក្រុមហេសបូឡានៅលីបង់ផងដែរ ហើយការចំណាយលើសេដ្ឋកិច្ចរបស់ប្រទេសនេះមានប្រហែល ១,៦ពាន់លានដុល្លារ ក្នុងមួយសប្តាហ៍។

ការខកខានមិនអនុម័តថវិកានេះទំនងជាបាននាំឲ្យមានការបោះឆ្នោតមុនអាណត្តិ ក្នុងរយៈពេល ៩០ថ្ងៃ ដែលការស្ទង់មតិរហូតមកដល់ពេលនេះ បានព្យាករថា លោក Netanyahu នឹងរងបរាជ័យ។ ការបោះឆ្នោតនេះគ្រោងនឹងធ្វើឡើងនៅចុងខែតុលា ទោះបីជាកាលបរិច្ឆេទមិនទាន់ត្រូវបានកំណត់ច្បាស់លាស់ក្ដី។ លោក Netanyahu បាននិយាយថា វាអាចនឹងធ្វើឡើងនៅខែកញ្ញា។

ការអនុម័តថវិកានៅនាទីចុងក្រោយនេះ បានលុបបំបាត់ឧបសគ្គដ៏សំខាន់មួយ សម្រាប់ទីផ្សារហិរញ្ញវត្ថុ និងសេដ្ឋកិច្ចរបស់អ៊ីស្រាអែល ដែលបានដំណើរការចាប់តាំងពីដើមឆ្នាំមក ដោយពឹងផ្អែកបណ្ដោះអសន្ន លើថវិកាឆ្នាំ២០២៥៕