បេសកកម្មថែរក្សាសន្តិភាពអង្គការសហប្រជាជាតិនៅលីបង់(UNIFIL) និយាយថា អ្នកថែរក្សាសន្តិភាពម្នាក់ ត្រូវបានសម្លាប់ នៅពេលដែលកាំជ្រួចផ្លោងបានផ្ទុះនៅលើទីតាំងឈរជើងរបស់ពួកគេ ជិតភូមិ Adchit al-Qusayr ស្ថិតនៅភាគខាងត្បូងប្រទេសលីបង់កាលពីថ្ងៃអាទិត្យ ។

ពួកគេនិយាយក្នុងសេចក្តីថ្លែងការណ៍នាថ្ងៃចន្ទនេះថា អ្នកថែរក្សាសនិ្តភាពម្នាក់ទៀត បានរងរបួសធ្ងន់ធ្ងរ ។

ក្រសួងការបរទេសឥណ្ឌូនេស៊ី និយាយនៅថ្ងៃចន្ទនេះថា អ្នកថែរក្សាសន្តិភាពដែលបានស្លាប់ ស្ថិតនៅក្នុងចំណោមពលរដ្ឋរបស់ខ្លួន ហើយមនុស្ស ៣នាក់ផ្សេងទៀត បានរងរបួស ដោយសារការផ្លោងគ្រាប់កាំភ្លើងធំដោយប្រយោលនៅក្បែរតំបន់ឈរជើងរបស់ពួកគេ ស្ថិតនៅជិតភូមិ Adchit al-Qusayr ។

UNIFIL និយាយថា ពួកយើងពុំបានដឹងពីប្រភពនៃកាំជ្រួចផ្លោងនោះទេ ហើយពួកយើងបានបើកការស៊ើបអង្កេតលើករណីមួយនេះ ដើម្បីកំណត់ពីមូលហេតុនៃការផ្លោងគ្រាប់កាំភ្លើងធំ ។

ក្រុមបេសកកម្ម UNIFIL ត្រូវបានឈរជើងនៅតំបន់ភាគខាងត្បូងលីបង់ ដើម្បីតាមដានអរិភាព នៅតាមខ្សែបន្ទាត់ព្រំដែនជាមួយអ៊ីស្រាអែល គឺជាតំបន់មួយដែលស្ថិតនៅកណ្តាលនៃការប៉ះទង្គិចគ្នារវាងទាហានអ៊ីស្រាអែល និងក្រុមយុទ្ធជនហេសបូឡា 

បេសកកម្មដែលនឹងត្រូវបញ្ឈប់នាដំណាច់ឆ្នាំ ២០២៦នេះ បានស្ថិតក្នុងគ្រោះថ្នាក់ម្តងម្កាលនៃជម្លោះរវាងអ៊ីស្រាអែល និងក្រុមហេសបូឡា ក្នុងរយៈពេល ២ឆ្នាំចុងក្រោយនេះ ៕