មន្រ្តីជាន់ខ្ពស់មួយរូបនិយាយថា កូរ៉េខាងត្បូងកំពុងពិចារណាលើការបន្តការទប់ស្កាត់ការបើកបររបស់សាធារណជនទូទាំងប្រទេស បើសិនជាតម្លៃប្រេងសកលហក់ឡើងខ្ពស់បន្ថែមទៀត ខណៈក្រុមអាជ្ញាធរព្យាយាមទប់ស្កាត់តម្រូវការថាមពល ពេលជួបវិបត្តិផ្គត់ផ្គង់ ដោយសារសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ ។

រដ្ឋមន្រ្តីហិរញ្ញវត្ថុកូរ៉េខាងត្បូងលោក Koo Yun-cheol និយាយកាលពីថ្ងៃអាទិត្យថា រដ្ឋាភិបាលអាចនឹងបង្កើនការរឹតត្បិតលើការប្រើប្រាស់រថយន្តដឹកអ្នកដំណើរ លើសពីស្ថាប័នសាធារណៈ បើសិនជាប្រេងឆៅកើនឡើងប្រហែល ១២០-១៣០ដុល្លារ ក្នុង ១បារ៉ែល ពោលគឺកើនឡើងពីតម្លៃបច្ចុប្បន្ន ១០០-១១០ដុល្លារ ក្នុង ១បារ៉ែល ។

បើសិនជាវារីករាលដាលដល់សាធារណជនទាំងមូល គោលការណ៍នឹងក្លាយជាការទប់ស្កាត់ការបើកបរនៅទូទំាងប្រទេសជាលើកដំបូងរបស់កូរ៉េខាងត្បូង ចាប់តាំងពីសង្រ្គាមឈូងសមុទ្រឆ្នាំ ១៩៩១ ពេលដែលរដ្ឋាភិបាលដាក់ចេញប្រព័ន្ធបង្វិលយានយន្ត ដើម្បីសន្សំសំចៃថាមពល ។

លោក Koo និយាយប្រាប់ទូរទស្សន៍ក្នុងស្រុកថា បើសិនជាស្ថានភាពមជ្ឈិមបូព៌ា កាន់តែអាក្រក់ទៅ ការប្រកាសអាសន្នវិបត្តិ ត្រូវតែបង្កើនដល់ដំណាក់កាលគ្រាអាសន្ន ហើយប្រហែលជាដល់ចំណុចដែលពួកយើងត្រូវការទប់ស្កាត់ការប្រើប្រាស់ថាមពល ។

លោកបន្តថា រដ្ឋាភិបាលអាចនឹងពិចារណាផងដែរការកាត់បន្ថយពន្ធប្រេងបន្ថែមទៀត ដើម្បីបន្ធូរបន្ថយបន្ទុកគ្រួសារ ។

ក្រសួងហិរញ្ញវត្ថុកូរ៉េខាងត្បូង និយាយនៅក្នុងការបញ្ចេញព័ត៌មានដាច់ដោយឡែកនាថ្ងៃចន្ទនេះថា ការទប់ស្កាត់ការបើកបរបណ្តោះអាសន្នលើវិស័យឯកជន នៅមិនទាន់សម្រេចចិត្តនោះទេ ៕