តម្លៃប្រេងឆៅបានហក់ឡើងខ្ពស់បំផុតក្នុងរយៈពេល ២សប្តាហ៍កន្លងមកនេះ ស្របពេលកើនឡើងភាពតានតឹងនៅតាមជួរមុខជាច្រើននៃសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ ។

តម្លៃប្រេងឆៅបានកើនឡើងចំនួនជាង ៣ភាគរយនៅព្រឹកថ្ងៃចន្ទនេះ ដល់កម្រិតខ្ពស់បំផុត ១១៦ដុល្លារ ក្នុង ១បារ៉ែល ។

ការកើនឡើងចុងក្រោយនេះ បានក្លាយជាតម្លៃប្រេងឆៅអន្តរជាតិខ្ពស់បំផុត ចាប់តាំងពីថ្ងៃទី ១៩ ខែមីនា ពេលដែលវាបានហក់ឡើងខ្ពស់មួយភ្លែតតម្លៃ ១១៩ដុល្លារ ក្នុង ១បារ៉ែល ។

ការកើនឡើងតម្លៃប្រេងឆៅនេះដែរ បានកើតមានឡើង ក្រោយអ៊ីរ៉ង់និយាយថា ពួកគេបានត្រៀមខ្លួនរួចរាល់សម្រាប់ការឈ្លានពានជើងគោករបស់សហរដ្ឋអាមេរិក ក្នុងនោះប្រធានសភាប្រទេសមួយនេះ ព្រមានថា ទីក្រុងតេអេរ៉ង់ រង់ចាំការមកដល់របស់ទាហានសហរដ្ឋអាមេរិក ដើម្បីដុតកម្ទេចពួកគេចោល និងដាក់ទោសសម្ព័ន្ធមិត្តក្នុងតំបន់ ។

ការព្រមានរបស់ទីក្រុងតេអេរ៉ង់ បានកើតមានឡើង ស្របពេលដែលជម្លោះកាន់តែលិចលង់ខ្លាំងកាលពីចុងសប្តាហ៍កន្លងទៅ ក្នុងនោះក្រុមឧទ្ទាមហ៊ូធីគាំទ្រដោយអ៊ីរ៉ង់ បានបើកការវាយប្រហារមីស៊ីលលើអ៊ីស្រាអែលជាលើកដំបូង នៅក្នុងសង្រ្គាមមួយនេះ ហើយអ៊ីស្រាអែល ពង្រីកការឈ្លានពានរបស់ខ្លួននៅតំបន់ភាគខាងត្បូងលីបង់ ។

ខណៈពេលនោះដែរ ភាគហ៊ុនអាស៊ីធ្លាក់ថ្លៃនៅថ្ងៃចន្ទនេះ ក្នុងនោះប្រេងឆៅឆ្ពោះទៅរកការកើនឡើងជាប់កំណត់ត្រាប្រចាំខែ បន្ទាប់ពីក្រុមឧទ្ទាមហ៊ូធីយេម៉ែន បើកការវាយប្រហារលើកដំបូងរបស់ខ្លួនលើអ៊ីស្រាអែលកាលពីចុងសប្តាហ៍នេះ ធ្វើឲ្យសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ កាន់តែរីកធំ នៅតំបន់មជ្ឈិមបូព៌ា ។

រយៈពេលប៉ុន្មាននាទី ក្រោយផ្សារភាគហ៊ុនអាស៊ីបើក ប្រេងឆៅសមុទ្រខាងជើង បានកើនឡើងចំនួន ២,៩៨ភាគរយ ដល់ ១១៥,៩៣ដុល្លារ ក្នុង ១បារ៉ែល ។

ផ្សារភាគហ៊ុនជប៉ុន Nikkei បានធ្លាក់ចុះចំនួន ៤,៦ភាគរយ នៅពេលសម្រាកថ្ងៃត្រង់នេះ ក្រោយធ្លាក់ចំនួន ៥,៣ភាគរយ មុននេះ ៕