នាវាដឹកប្រេងរុស្ស៊ីពេញដោយប្រេងឆៅ បានចូលក្នុងដែនទឹកគុយបា ហើយត្រូវបានគេរំពឹងថា នឹងចូលចតកំពង់ផែនៅថ្ងៃចន្ទនេះ ជាការផ្តល់ការរស់រានដល់ប្រទេសគុយ ស្របពេលប្រធានាធិបតីសហរដ្ឋអាមេរិកលោក Donald Trump ទំនងជាបន្ធូរបន្ថយការបិទប្រេងតាមព្រឹត្តន័យលើប្រទេសកោះនៅតំបន់ការ៉ាអ៊ីបមួយនេះ ។

ទិន្ន័យតាមដានផ្លូវដឹកជញ្ជូន ឃើញនាវាដឹកប្រេងដោតទង់ជាតិរុស្ស៊ី Anatoly ⁠Kolodkin នៅជិតតំបន់ជ្រោយភាគខាងកើតប្រទេសគុយបា កាលពីថ្ងៃអាទិត្យ ។ 

គេហទំព័រព័ត៌មានផ្លូវការ Cubadebate របស់គុយបា រាយការណ៍ថា នាវាមួយគ្រឿងនេះ គ្រោងនឹងធ្វើដំណើរទៅដល់កំពង់ផែ Matanzas នៅថ្ងៃចន្ទនេះ ។

ថ្លែងទៅកាន់ក្រុមអ្នកសារព័ត៌មាននៅលើយន្តហោះ Air Force One លោក Trump បានបង្ហាញ សញ្ញាបត់បែនថ្មី ក្នុងការអនុញ្ញាតឲ្យប្រេងចូលទៅក្នុងប្រទេសគុយបា ដោយរូបលោកនិយាយថា បើសិនជាប្រទេសចង់បញ្ជូនប្រេងមួយចំនួនចូលទៅក្នុងប្រទេសគុយបាឥឡូវនេះ លោកគ្មានបញ្ហាឡើយ មិនថាវាជាប្រេងរុស្ស៊ី ឬមិនមែននោះទេ ។

មកទល់នឹងពេលនេះ លោក Trump បានបញ្ឈប់ដោយប្រសិទ្ធិភាពការដឹកជញ្ជូនប្រេងទាំងអស់ចូលទៅក្នុងប្រទេសគុយបា នៅក្នុងការប៉ុនប៉ងមួយដើម្បីដាក់សម្ពាធលើរដ្ឋាភិបាលនៅទីក្រុងឡាហាវ៉ាន់ ខណៈរូបលោកចេញសេចក្តីថ្លែងការណ៍គំរាមកំហែងជាបន្តបន្ទាប់លើទីក្រុងឡាហាវ៉ាន់ ។

សូមបញ្ជាក់ថា នាវាដឹកប្រេង Anatoly ⁠Kolodkin បានចាកចេញពីកំពង់ផែ Primorsk របស់រុស្ស៊ី ដោយដឹកប្រេងឆៅចំនួន ៦៥ម៉ឺនបារ៉ែល ៕