រដ្ឋមន្ត្រីក្រសួងការពារជាតិ លោកស្រី Margarita Robles បាននិយាយនៅថ្ងៃចន្ទ (ទី៣០ ខែមីនា ឆ្នាំ២០២៦) នេះថា ប្រទេសអេស្ប៉ាញបានបិទដែនអាកាសរបស់ខ្លួនមិនឲ្យយន្តហោះអាមេរិកហោះហើរ ពាក់ព័ន្ធនឹងការវាយប្រហារលើអ៊ីរ៉ង់ ជាចំណាត់ការលើសពីការបដិសេធពីមុនរបស់ខ្លួន ដែលមិនព្រមឲ្យប្រើប្រាស់មូលដ្ឋានយោធាមានប្រតិបត្តិការរួមគ្នា។

លោកស្រី Robles បានប្រាប់អ្នកសារព័ត៌មាននៅទីក្រុងម៉ាឌ្រីដថា៖ «យើងមិនអនុញ្ញាតឱ្យប្រើប្រាស់មូលដ្ឋានយោធា ឬការប្រើប្រាស់ដែនអាកាស សម្រាប់សកម្មភាពទាក់ទងនឹងសង្គ្រាមនៅអ៊ីរ៉ង់ឡើយ»។

សារព័ត៌មានអេស្ប៉ាញ El Pais បានរាយការណ៍ព័ត៌មាននេះដំបូងគេនៅថ្ងៃចន្ទនេះ ដោយដកស្រង់ប្រភពពីយោធា។ សារព័ត៌មាន El Pais បានឲ្យដឹងបន្ថែមថា ការបិទដែនអាកាសបង្ខំឲ្យយន្តហោះយោធាហោះហើរគេចពីអេស្ប៉ាញដែលជាប្រទេសសមាជិកអង្គការណាតូ (NATO) ក្នុងដំណើរផ្លូវទៅកាន់គោលដៅរបស់ពួកគេ នៅតំបន់មជ្ឈិមបូព៌ា ប៉ុន្តែការបិទនេះមិនរាប់បញ្ចូលស្ថានភាពអាសន្នទេ។

នៅពេលសួរថាតើការសម្រេចបិទដែនអាកាសរបស់អេស្ប៉ាញ អាចធ្វើឲ្យទំនាក់ទំនងជាមួយសហរដ្ឋអាមេរិកកាន់តែអាក្រក់ទៅៗដែរ ឬទេ រដ្ឋមន្ត្រីក្រសួងសេដ្ឋកិច្ច លោក Carlos Cuerpo បាននិយាយអំឡុងសម្ភាសន៍ជាមួយវិទ្យុ Cadena Ser ថា៖ «ជម្រើសនេះ គឺជាផ្នែកមួយនៃការសម្រេចដែលធ្វើឡើងរួចហើយដោយរដ្ឋាភិបាលអេស្ប៉ាញដែលមិនចូលរួម ឬរួមចំណែកដល់សង្គ្រាមដែលត្រូវបានផ្តួចផ្តើមឡើងជាតោភាគី និងប្រឆាំងនឹងច្បាប់អន្តរជាតិ»៕