យោធាអ៊ីស្រាអែល នៅថ្ងៃចន្ទ (ទី៣០ ខែមីនា ឆ្នាំ២០២៦) នេះ បានប្រាប់ឲ្យដឹងថា ខ្លួនបានដកកងវរសេនាធំមួយ នៅតំបន់ West Bank បន្ទាប់ពីទាហានម្នាក់បានវាយប្រហារអ្នកថតរូប សម្រាប់សារព័ត៌មាន CNN កាលពីសប្តាហ៍មុន នៅក្នុងភូមិមួយ ក្នុងដែនដីកាប់កាប់ប៉ាឡេស្ទីន។

ក្រុមអ្នកសារព័ត៌មានរបស់ប្រព័ន្ធផ្សាព្វផ្សាយ CNN កំពុងរាយការណ៍អំពីផលវិបាកនៃការវាយប្រហារដោយអ្នកតាំងលំនៅជនជាតិអ៊ីស្រាអែល និងការបង្កើតប៉ុស្តិ៍ខុសច្បាប់មួយ នៅជិតភូមិ Tayasir របស់ប្រជាជនប៉ាឡេស្ទីន កាលពីថ្ងៃព្រហស្បតិ៍ នៅពេលដែលពួកគេត្រូវបានចាប់ខ្លួនដោយទាហានអ៊ីស្រាអែល។ នេះបើយោងតាមសេចក្តីថ្លែងការណ៍របស់សមាគមសារព័ត៌មានបរទេស (FPA)។

បន្ទាប់ពីទាហានតម្រង់កាណុងកាំភ្លើងរបស់ពួកគេ សម្ដៅទៅក្រុមអ្នកសារព័ត៌មាន CNN «ទាហានម្នាក់របស់ IDF (កងកម្លាំងការពារជាតិអ៊ីស្រាអែល) បានចូលទៅជិតអ្នកថតរូបសម្រាប់សារព័ត៌មាន CNN ពីខាងក្រោយ ក្រៀកបំពង់កគាត់ពីក្រោយ រុញគាត់ទៅលើដី និងបំផ្លាញកាមេរ៉ារបស់គាត់»។ នេះបើយោងតាមសមាគមនេះ ដែលតំណាងឲ្យអ្នកសារព័ត៌រាប់រយនាក់នៅក្នុងប្រទេសអ៊ីស្រាអែល និងទឹកដីប៉ាឡេស្ទីន។

ប្រព័ន្ធផ្សព្វផ្សាយ CNN បានបញ្ជាក់ពីព័ត៌មានលម្អិតនៅក្នុងរបាយការណ៍ផ្ទាល់របស់ខ្លួន ស្ដីពីហេតុការណ៍នេះ ដោយកំណត់អត្តសញ្ញាណអ្នកថតរូបសម្រាប់សារព័ត៌មានរូបនោះថា ជាជនជាតិបារាំង ឈ្មោះ Cyril Theophilos។

FPA បានលើកឡើងថា៖ «នេះមិនមែនជាការយល់ច្រឡំនោះទេ តែវាគឺជាការវាយប្រហារដោយហិង្សាលើអ្នកសារព័ត៌មានដែលមានអត្តសញ្ញាណយ៉ាងច្បាស់ និងជាការវាយប្រហារដោយផ្ទាល់ទៅលើសេរីភាពសារព័ត៌មាន»។

នៅថ្ងៃចន្ទនេះ យោធាបានដកកងវរសេនាធំមួយចេញពីតំបន់ West Bank បន្ទាប់ពីកើតហេតុការណ៍នេះ។ កងទ័ពបានឲ្យដឹងនៅក្នុងសេចក្តីថ្លែងការណ៍មួយថា៖ «ការដាក់ពង្រាយប្រតិបត្តិការដែលកំពុងត្រូវបានអនុវត្តដោយកងវរសេនាធំបម្រុង នឹងត្រូវផ្អាក។ កងវរសេនាធំនេះ នឹងនៅតែស្ថិតក្នុងសេវាកម្មបម្រុង ហើយនឹងឆ្លងកាត់ដំណើរការមួយដែលមានគោលបំណងពង្រឹងមូលដ្ឋានគ្រឹះវិជ្ជាជីវៈ និងសីលធម៌របស់ខ្លួន»៕