អង្គការណាសា ត្រៀមបាញ់បង្ហោះអវកាយានិកលើកដំបូងរបស់ខ្លួនទៅកាន់ឋានព្រះចន្ទ ក្នុងរយៈពេលជាង ៥៣ឆ្នាំ ជាមួយបេសកកម្ម Artemis លើកទី ២ ដែលជាការហោះហើរសាកល្បងដ៏សំខាន់មួយនៅក្នុងការវិលត្រឡប់ទៅកាន់ឋានព្រះចន្ទវិញរបស់មនុស្ស ស្របពេលដែលសហរដ្ឋអាមេរិក ព្យាយាមប្រជែងដណ្តើមការឈានមុខគេនៅទីអវកាស ខណៈមានការប្រកួតប្រជែងកើនឡើងពីចិន ។

អវកាសយានិកសហរដ្ឋអាមេរិក ៣រូប និងអវកាសយានិកកាណាដា ១រូប គ្រោងនឹងហោះចេញនៅលើយានអវកាស Orion របស់អង្គការណាសា និងយានចម្លង SLS នៅថ្ងៃពុធ ទី ១ ខែមេសាខាងមុខនេះ សម្រាប់បេសកកម្មសាកល្បងយៈពេល ១០ថ្ងៃនៅជុំវិញឋានព្រះចន្ទ ហើយនិងត្រឡប់មកវិញ គឺជាដំណើរមួយឲ្យពួកគេចូលកាន់តែជ្រៅនៅក្នុងទីអវកាស ជាងពេលដែលមនុស្សធ្លាប់ទៅកាលពីមុន ។

បេសកកម្មនេះ គឺជាការហោះហើរសាកល្បងមានអវកាសយានិកលើកដំបូងនៅក្នុងកម្មវិធី Artemis តម្លៃរាប់ពាន់លានដុល្លាររបស់អង្គការណាសា និងជាកិច្ចខិតខំមួយរបស់សហរដ្ឋអាមេរិក ក្នុងការបញ្ជូនមនុស្សទៅកាន់ឋានព្រះចន្ទវិញក្នុងទសវត្សរ៍នេះ ។

ចាប់តាំងពីបេសកម្ម Apollo 17 កាលពីឆ្នាំ ១៩៧២រហូតមក ពុំដែលមានមនុស្សណាបានប៉ះផ្ទៃព្រះចន្ទនោះទេ គឺជាជោគជ័យមួយអង្គការណាសាចង់សម្រេចឲ្យបានម្តងទៀតនៅឆ្នាំ ២០២៨ នៅប៉ូលខាងត្បូងរបស់ឋានព្រះចន្ទ ។

អ្នកស្រី Lori Glaze គឺជាអវកាសយានិករបស់អង្គការណាសា និយាយថា យានអវកាស Orion នឹងចំណាយពេល ២៤ម៉ោង នៅក្នុងគន្លងផែនដី ក្រោយការបាញ់បង្ហោះ ដើម្បីសាកល្បងការគ្រប់គ្រងបរិស្ថានរបស់យាន ហើយនិងប្រព័ន្ធគាំទ្រជីវិត ៕