ទីភ្នាក់ងារពន្លត់អគ្គិភ័យ និងជួយសង្គ្រោះរបស់អ៊ីស្រាអែល បានឲ្យដឹងនៅថ្ងៃចន្ទ (ទី៣០ ខែមីនា ឆ្នាំ២០២៦) នេះថា អគារឧស្សាហកម្ម ១ខ្នង និងរថយន្តដឹកប្រេង ១គ្រឿង នៅរោងចក្រចម្រាញ់ប្រេងរបស់អ៊ីស្រាអែល ដែលមានទីតាំងនៅភាគខាងជើងនៃទីក្រុងហៃហ្វា ត្រូវបានបំណែកមីស៊ីលដែលត្រូវបានស្ទាក់ចាប់ធ្លាក់ត្រូវ។

ភ្លាមៗនេះ គេមិនទាន់ដឹងច្បាស់នៅឡើយទេថា តើមីស៊ីលនេះត្រូវបានបាញ់ចេញពីអ៊ីរ៉ង់ ឬពីក្រុមសកម្មប្រយុទ្ធហេសបូឡាគាំទ្រដោយអ៊ីរ៉ង់ នៅប្រទេសលីបង់ ដោយសម្ព័ន្ធមិត្តទាំង២ កំពុងបាញ់ក្នុងពេលតែមួយ។ ទីភ្នាក់ពន្លត់អគ្គិភ័យបាននិយាយថា ការវាយប្រហារដោយផ្ទាល់មួយ ត្រូវបានកំណត់អត្តសញ្ញាណ នៅឯកន្លែងស៊ីទែនស្តុកប្រេងសាំងនៅក្នុងបរិវេណរោងចក្រ ដែលបណ្តាលឲ្យមានអគ្គិភ័យ និងសំណុំផ្សែងដ៏ក្រាស់ហុយចេញពីដំបូលនៃរចនាសម្ព័ន្ធក្បែរនោះ។

យ៉ាងណាក្ដី ប្រធានទីភ្នាក់ពន្លត់អគ្គិភ័យ លោក Eitan Rifa បាននិយាយថា៖ «ឧប្បត្តិហេតុនេះត្រូវបានគ្រប់គ្រងទាំងស្រុង។ មិនមានអ្នកស្លាប់ និងអ្នករបួស គ្មានហានិភ័យធ្វើឲ្យខូចខាតសម្ភារៈ និងគ្មានគ្រោះថ្នាក់ដល់សាធារណជនឡើយ»។ ចំណែករដ្ឋមន្ត្រីក្រសួងថាមពលអ៊ីស្រាអែល លោក Eli Cohen បាននិយាយថា មិនមានការខូចខាតដល់រោងចក្រផលិតទេ ហើយការផ្គត់ផ្គង់ប្រេងឥន្ធនៈ នឹងមិនរងផលប៉ះពាល់ឡើយ។

រោងចក្រចម្រាញ់ប្រេង ដែលនៅជិតមូលដ្ឋានទ័ពជើងទឹកដ៏សំខាន់របស់អ៊ីស្រាអែល និងត្រូវបានគេស្គាល់ផងដែរថា ជា Bazan បានរងការខូចខាតខ្លះពីការវាយប្រហារដោយមីស៊ីលរបស់អ៊ីរ៉ង់កាលពីថ្ងៃទី២០ ខែមីនា។ អំឡុងជម្លោះកាលពីខែមិថុនាឆ្នាំមុន រោងចក្រចម្រាញ់ប្រេងរបស់ក្រុមហ៊ុន Bazan ត្រូវបានបិទបន្ទាប់ពីរោងចក្រថាមពលដែលប្រើសម្រាប់ផលិតចំហាយទឹក និងអគ្គិសនី ត្រូវបានខូចខាតយ៉ាងធ្ងន់ធ្ងរ ដោយសារការវាយប្រហាររបស់អ៊ីរ៉ង់៕