រយៈពេលជាងមួយខែនៅក្នុងសង្គ្រាមជាមួយសហរដ្ឋអាមេរិក និងអ៊ីស្រាអែល ពេលនេះអ៊ីរ៉ង់កំពុងព្យាយាមទប់ស្កាត់រាល់ការផ្ទុះឡើងវិញនៃចលនាតវ៉ាក្នុងស្រុក តាមរយៈការចាប់ខ្លួន ការប្រហារជីវិត និងការដាក់ពង្រាយកងកម្លាំងសន្តិសុខ និងក្រុមអ្នកគាំទ្រយ៉ាងច្រើនសន្ធឹកសន្ធាប់នៅតាមដងផ្លូវ រហូតដល់មានការជ្រើសរើសកុមារឱ្យធ្វើជាបុគ្គលិកប្រចាំការនៅតាមប៉ុស្តិ៍ត្រួតពិនិត្យផងដែរ នេះបើយោងតាមសេចក្ដីរាយការណ៍របស់សារព័ត៌មានរ៉យទ័រ។

ទោះបីជាមកទល់ពេលនេះ មិនទាន់មានសញ្ញាណាមួយដែលបង្ហាញថាប្រជាជនហ៊ានក្រោកប្រឆាំងនឹងការព្រមានដ៏តឹងរ៉ឹងមិនឱ្យធ្វើបាតុកម្មក៏ដោយ ក៏ប៉ុន្តែក្រុមមន្ត្រីបារម្ភថា ការខូចខាតផ្នែកសេដ្ឋកិច្ចដែលកំពុងតែដុនដាបស្រាប់ នឹងជំរុញឱ្យមានការប្រឆាំងកាន់តែខ្លាំងឡើងចំពោះរបបដឹកនាំ នៅពេលជម្លោះបញ្ចប់ទៅ។ ប្រភពព័ត៌មាននៅអ៊ីរ៉ង់ រួមជាមួយក្រុមសិទ្ធិមនុស្សនៅខាងក្រៅ កំពុងបារម្ភថា នៅពេលកងឆ្មាំបដិវត្តន៍ដែលប្រកាន់ជំហរតឹង បន្តកាន់អំណាច ស្ថានកាណ៍អាចនឹងឈានទៅដល់ការប្រឈមមុខដាក់គ្នាផ្ទៃក្នុងយ៉ាងបង្ហូរឈាម។

ទាំងលោកប្រធានាធិបតីអាមេរិក Donald Trump និងលោកនាយករដ្ឋមន្ត្រីអ៊ីស្រាអែល Benjamin Netanyahu សុទ្ធតែបានបង្ហាញក្តីសង្ឃឹមនៅពេលចាប់ផ្តើមសង្គ្រាមថា ការវាយប្រហាររបស់ភាគីទាំងពីរអាចនឹងធ្វើឱ្យរបបដឹកនាំបែបសាសនារបស់អ៊ីរ៉ង់ដួលរលំ។ ប៉ុន្តែ បើទោះបីជាមានការវាយប្រហារតាមអាកាសយ៉ាងខ្លាំងក្លាពីសំណាក់អាមេរិក និងអ៊ីស្រាអែលអស់ជាងមួយខែមកហើយក្ដី ក៏ថ្នាក់ដឹកនាំអ៊ីរ៉ង់ហាក់ដូចជាមានទំនុកចិត្តថា ពួកគេអាចស៊ូទ្រាំបានយូរជាងសត្រូវរបស់ខ្លួន ដោយការបិទច្រកសមុទ្រហ័រមូស និងការវាយប្រហារលើបណ្តាប្រទេសផលិតប្រេងនៅតំបន់ឈូងសមុទ្រអារ៉ាប់ ដើម្បីបង្កវិបត្តិប្រេង និងឧស្ម័នទូទាំងពិភពលោក។

អ្វីដែលផ្ទុយស្រឡះគឺថា ពេលវេលាដ៏គ្រោះថ្នាក់បំផុតសម្រាប់ថ្នាក់ដឹងនាំអ៊ីរ៉ង់ អាចនឹងមកដល់នៅពេលការទម្លាក់គ្រាប់បែកបានបញ្ឈប់ ពោលគឺជាពេលដែលប្រជាជនអ៊ីរ៉ង់សម្លឹងមើលទៅគំនរបាក់បែកនៃសេដ្ឋកិច្ចរបស់ខ្លួន និងពិចារណាលើអនាគតដ៏ខ្មៅងងឹត។ ប្រភពនៅអ៊ីរ៉ង់បានលើកឡើងថា ក្ដីបារម្ភអំពីអស្ថិរភាពនាពេលអនាគត គឺជាមូលហេតុចម្បងនៃការបង្ក្រាបនាពេលបច្ចុប្បន្ននេះ៕