សារព័ត៌មាន Wall Street Journal បានរាយការណ៍កាលពីថ្ងៃចន្ទ៣០មីនា ដើមសប្ដាហ៍នេះ ដោយដកស្រង់សម្តីមន្ត្រីរដ្ឋបាលថា លោកប្រធានាធិបតីអាមេរិក Donald Trump បានប្រាប់ជំនួយការថា លោកមានឆន្ទៈបញ្ចប់យុទ្ធនាការយោធាប្រឆាំងនឹងអ៊ីរ៉ង់ ទោះបីជាច្រកសមុទ្រ Hormuz នៅតែបិទភាគច្រើន ហើយទុកប្រតិបត្តិការស្មុគស្មាញមួយដើម្បីបើកឡើងវិញសម្រាប់ថ្ងៃក្រោយក៏ដោយ ។

ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់របាយការណ៍នេះភ្លាមៗបានទេ។

ការអត្ថាធិប្បាយរបស់លោក Trump បានកើតឡើងនៅថ្ងៃតែមួយដែលនាយករដ្ឋមន្ត្រីអ៊ីស្រាអែល លោក Benjamin Netanyahu បានលើកឡើងថាដំណោះស្រាយរយៈពេលវែងចំពោះវិបត្តិច្រកសមុទ្រ Hormuz អាចសម្រេចបានដោយគ្មានប្រតិបត្តិការយោធា ប៉ុន្តែផ្ទុយទៅវិញ ដោយការផ្លាស់ប្តូរផ្លូវបំពង់បង្ហូរប្រេងរបស់រដ្ឋឈូងសមុទ្រ។

លោក Netanyahu បានពន្យល់នៅក្នុងបទសម្ភាសន៍ជាមួយប្រព័ន្ធផ្សព្វផ្សាយអភិរក្សនិយមរបស់សហរដ្ឋអាមេរិក Newsmax ថា ដំណោះស្រាយរយៈពេលវែងរួមមានការផ្លាស់ប្តូរផ្លូវបំពង់បង្ហូរថាមពលទៅទិសខាងលិច ឆ្លងកាត់អារ៉ាប៊ីសាអ៊ូឌីតទៅកាន់សមុទ្រក្រហម និងមេឌីទែរ៉ាណេ ដោយរំលងចំណុចកកស្ទះភូមិសាស្ត្ររបស់អ៊ីរ៉ង់។

បច្ចុប្បន្ននេះ ច្រកសមុទ្រនេះគឺជាចំណុចឆ្លងកាត់ដ៏សំខាន់មួយនៅក្នុងទីផ្សារថាមពល ដោយមាន ២០% នៃការនាំចេញប្រេងសកលឆ្លងកាត់ច្រកសមុទ្រនេះ៕