ទីភ្នាក់ងារសារព័ត៌មានរដ្ឋកូវ៉ែត បានរាយការណ៍ថា អ៊ីរ៉ង់បានវាយប្រហារនាវាដឹកប្រេងឆៅដែលផ្ទុកពេញនៅកំពង់ផែឌូបៃ កាលពីថ្ងៃចន្ទ ទី៣០ ខែមីនា បណ្តាលឲ្យនាវាឆាបឆេះ នេះបើយោងតាមការដកស្រង់សម្តីរបស់ក្រុមហ៊ុនប្រេងប្រទេសកូវ៉ែត ដែលបានព្រមានថា ប្រេងហូរចេញអាចកើតមាន។

ការវាយប្រហារនេះ កើតឡើងចុងក្រោយបំផុតក្នុងការវាយប្រហារជាបន្តបន្ទាប់លើនាវាពាណិជ្ជកម្មដោយមីស៊ីល ឬយានដ្រូនបំពាក់គ្រឿងផ្ទុះលើអាកាសនិងនៅសមុទ្រ នៅរដ្ឋឈូងសមុទ្រ និងច្រកសមុទ្រ Hormuz ចាប់តាំងពីសហរដ្ឋអាមេរិក និងអ៊ីស្រាអែល បានវាយប្រហារលើអ៊ីរ៉ង់នៅថ្ងៃទី២៨ ខែកុម្ភៈ។

តម្លៃប្រេងឆៅ Futures របស់សហរដ្ឋអាមេរិកបានកើនឡើងជាង៣ដុល្លារអាមេរិក ឬ២,៩ភាគរយឡើងដល់ ១០៥,៩១ដុល្លារអាមេរិកក្នុងមួយបារ៉ែល បន្ទាប់ពីមានព័ត៌មានថា នាវាដឹកប្រេង Al-Salmi បំពាក់ទង់ជាតិកូវ៉ែតត្រូវបានវាយប្រហារ។ អាជ្ញាធរនៅទីក្រុងឌូបៃបានបញ្ជាក់ថា ពួកគេកំពុងឆ្លើយតបទៅនឹងការវាយប្រហារដោយយានដ្រូនលើនាវាដឹកប្រេងកូវ៉ែតនៅក្នុងដែនទឹកឌូបៃ ហើយក្រុមពន្លត់អគ្គិភ័យតាមសមុទ្រកំពុងធ្វើការដើម្បីគ្រប់គ្រងអណ្តាតភ្លើង។

អាជ្ញាធរនិយាយថា គ្មានអ្នករងរបួសត្រូវបានរាយការណ៍ទេ ហើយសុវត្ថិភាពរបស់សមាជិកនាវិកទាំង ២៤ នាក់មានសុវត្ថិភាព។ ការងារកំពុងដំណើរការដើម្បីវាយតម្លៃការខូចខាតដល់នាវាដឹកប្រេង នេះបើយោងតាមទិន្នន័យក្រុមហ៊ុនដែលបានចុះបញ្ជី និងជាប្រតិបត្តិករពាណិជ្ជកម្មរបស់នាវា។