ក្រុមហេសបូឡារបស់ប្រទេសលីបង់បាននិយាយថាខ្លួនបានបើកការវាយប្រហារចំនួន ៤០ លើកទៅលើទីតាំងយោធា មូលដ្ឋានទ័ព តំបន់លំនៅឋាន និងកងទ័ពអ៊ីស្រាអែល ក្នុងរយៈពេល ២៤ ម៉ោងកន្លងមកនេះ។ក្នុងសេចក្តីថ្លែងការណ៍ជាបន្តបន្ទាប់ដែលត្រូវបានតាមដានដោយសារព័ត៌មាន Anadoluរបស់ទួរគី ក្រុមនេះបាននិយាយថាប្រតិបត្តិការនេះត្រូវបានអនុវត្ត ដើម្បីការពារប្រទេសលីបង់ និងកងកម្លាំងរបស់ខ្លួន។

ការវាយប្រហារទាំងនោះរួមមានការបាញ់គ្រាប់រ៉ូកែត និងយានដ្រូន ដែលកំណត់គោលដៅលើតំបន់តាំងទីលំនៅ ក្នុងទីប្រជុំជន Metula ស្រុក Dovev ទីក្រុង Kiryat Shmona តំបន់ Yir’on និងទីក្រុងឆ្នេរសមុទ្រ Nahariya នៅភាគខាងជើងអ៊ីស្រាអែល។

ក្រុមហេសបូឡា និយាយថាខ្លួនក៏បានកំណត់គោលដៅទៅលើភូមិ Ghajar ភូមិ Shomera និងតំបន់ Mishmar HaCarmel ភាគខាងត្បូងនៃទីក្រុង Haifa ផងដែរ បន្ថែមពីលើមូលដ្ឋានកងទ័ពជើងទឹក Haifa។ក្រុមនេះបាននិយាយថាខ្លួនបានបាញ់ទៅលើអ្វីដែលខ្លួនហៅថាជា គ្រាប់រ៉ូកែតទំនើប ទៅកាន់មូលដ្ឋាន Glilot ជិតទីក្រុង Tel Aviv ដែលជាទីតាំងទីស្នាក់ការកណ្តាលចារកម្មយោធាអង្គភាព 8200 របស់អ៊ីស្រាអែល។

នៅភាគខាងត្បូងលីបង់ ក្រុមហេសបូឡា និយាយថា ខ្លួនបានកំណត់គោលដៅលើការប្រមូលផ្តុំកងទ័ព និងយានយន្តរបស់អ៊ីស្រាអែលនៅក្នុងទីក្រុងព្រំដែនជាច្រើន រួមទាំង ទីក្រុង Adaisseh, Deir Siryan, Ainata និងទីក្រុង Bayyada ដោយរាយការណ៍ពីអ្វីដែលខ្លួនហៅថាជាការវាយប្រហារដោយផ្ទាល់។អ៊ីស្រាអែលបានវាយប្រហារតាមអាកាសលើលីបង់ និងបានបើកការវាយលុកថ្មើរជើងនៅភាគខាងត្បូងលីបង់ ចាប់តាំងពីការវាយប្រហារឆ្លងព្រំដែនដោយក្រុមហេសបូឡានៅថ្ងៃទី ២ ខែមីនា។ អាជ្ញាធរលីបង់និយាយថា មនុស្សយ៉ាងហោចណាស់១.២៤៧នាក់ត្រូវបានសម្លាប់ និង៣.៦៩០នាក់រងរបួសនៅក្នុងការវាយប្រហាររបស់អ៊ីស្រាអែល៕