កម្ពុជា-សឹង្ហបុរី ដាក់ឱ្យដំណើរការជាផ្លូវការ លើការទូទាត់ឆ្លងដែនតាមឃ្យូអរកូត(QRCode) ដំណាក់​កាលទី២ (សឹង្ហបុរីស្កេនខេអេចឃ្យូអរកូត ប្រទេសកម្ពុជា) ដើម្បីសម្រួ​ល​ដល់ប្រ​ជាជន​សឹង្ហ​បុរី​អាចស្កេនទូទាត់ថ្លៃទំនិញ និងសេវា តាមខេអេឃ្យូរអរកូតនៃគណនីប្រាក់រៀល។

លោក​ជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា នៅថ្ងៃទី៣០ ខែមីនា ឆ្នាំ២០២៦ អញ្ជើញ​ជា​អធិបតីក្នុងពិធី ដាក់ឱ្យដំណើរការជាផ្លូវការ នៃការទូទាត់ឆ្លងដែនតាមឃ្យូអរកូត រវាង​ព្រះ​រា​ជា​ណាចក្រកម្ពុជា និងសាធារណរដ្ឋសិង្ហបុរី ដំណាក់កាល ទី២៖ នៅរាជធានីភ្នំពេញ។ ការដាក់​ឱ្យដំណើរការទូទាត់ឆ្លងដែននេះ នឹងសម្រួលឱ្យប្រជាជនសិង្ហបុរី អាច​ស្កេន​ទូទាត់ថ្លៃទំនិញ និង សេវាតាមខេអេចឃ្យូអរកូតនៃគណនីប្រាក់រៀល របស់ពាណិជ្ជករ​ប្រមាណជា​ង ​៤,៥ លានកន្លែង នៅទូទាំងប្រទេសកម្ពុជា ដោយប្រើ ប្រាស់​កម្ម​វិធី​ធនាគារ​ចល័ត​របស់​គ្រឹះ​ស្ថាន​ធនាគារ និងហិរញ្ញវត្ថុនៃប្រទេសសិង្ហបុរី ប្រកបដោយភាពងាយស្រួល រហ័សនិងសុវត្ថិភាព ដែល​នឹងរួមចំណែកពង្រីកលទ្ធភាពក្នុងការធ្វើអន្តរប្រតិបត្តិការទូទាត់ឆ្លងដែន រវាង​ប្រទេស​ទាំង​ពីរ​ឱ្យ​កាន់​តែ​ទូលំទូលាយ។

លោក Chia Der Jiun នាយកគ្រប់គ្រងនៃអាជ្ញាធររូបិយវត្ថុសិង្ហបុរី ក៏បានចូ​ល​រួម​តាម​ប្រព័ន្ធ​អន​ឡាញ និងបានបង្ហាញពីការ ប្តេជ្ញាចិត្ត ក្នុងការពង្រឹងកិច្ចសហប្រតិបត្តិការ ហិរញ្ញវត្ថុ​ក្នុង​តំបន់​អាស៊ាន ​និងការតភ្ជាប់ប្រព័ន្ធទូទាត់ឌីជីថលឱ្យកាន់តែរឹងមាំ។

លោកបណ្ឌិត អ៊ិន ចាន់នី នាយកប្រតិបត្តិធនាគារអេស៊ីលីដា លើកឡើងថា ការទូទាត់​ឆ្លង​ដែ​ននេះ​ពិ​តជាមានសារៈសំខាន់ ណាស់ ជាមធ្យោបាយដែលផ្តល់ភាពងាយស្រួលដល់ការទូទាត់ ដោយ​មិនចាំបាច់ស្វែងរកបញ្ជ និងមានសុវត្ថិភាពខ្ពស់ ក្នុងនោះប្រទេសសឹង្ហបុរី មាន​ពាណិជ្ជករ​ដែល​អាច​ធ្វើការទូទាត់បាននាឆ្នាំកន្លងមក ចំនួនប្រមាណ ៣ ម៉ឺនដៃគូ និងនៅក្នុងឆ្នាំ២០២ នេះ គ្រោង ប្រមាណ ៤,៧ ម៉ឺន ហើយនៅឆ្នាំ២០២៧ នឹងបង្កើនដៃគូអាចទូទាត់បានឱ្យដល់ ១០ ម៉ឺន​កន្លែង ហើយតាម រយៈនឹងជួយដល់ការធ្វើ ពាណិជ្ជកម្ម និងទេសចរណ៍ជាដើម។

សមិទ្ធផលខាងលើនេះ បានកើតចេញពីគំនិតផ្ដួចផ្ដើមក្នុងការអភិវឌ្ឍគម្រោង មាន​ធនាគារ​ទំនាក់​ទំនង​ចំនួន​២​គឺ៖ ធនាគារ អេស៊ីលីដា ភីអិលស៊ី និងធនាគារហ្វីលីព ភីអិលស៊ី ដែលមានភាគ​ទុនិក​មក​ពី Phillip Group សិង្ហបុរី និងប្រតិបត្តិករ Liquid នៃ ប្រទេសសិង្ហបុរី ដែល​សបញ្ជាក់​ពី​កិច្ច​ខិត​ខំ​ប្រឹង​ប្រែងរួមគ្នា ទាំងវិស័យសាធារណៈនិងវិស័យឯកជន ក្នុងការពង្រឹងកិច្ចសហប្រតិបត្តិការ នៃ​ប្រទេសទាំងពីរឱ្យកាន់តែជិតស្និទ្ធ។ ការដាក់ឱ្យដំណើរការជាផ្លូវការដំណាក់កាលទី២នេះ នឹង​រួម​ចំណែក​យ៉ាងសំខាន់ក្នុងការជំរុញ ការតភ្ជាប់ការទូទាត់ឆ្លងដែនជាឌីជីថល ស្របតាម​ទស្សន​វិស័យ​របស់​អាស៊ាន ក្នុងការអភិវឌ្ឍការ​ធ្វើ​អន្តរ​ប្រតិបត្តិការ​ទូទាត់​ក្នុង​តំបន់​លើកកម្ពស់​ការ​ប្រើ​ប្រាស់​រូបិយវត្ថុជាតិ ក្នុងការធ្វើប្រតិបត្តិការទូទាត់ ដើម្បីជំរុញនិង​សម្រួល​សកម្មភាព​ពាណិជ្ជ​កម្ម​វិនិ​យោគ និងទេសចរណ៍រវាងប្រទេសក្នុងតំបន់ឱ្យកាន់តែប្រសើរឡើងបន្ថែមទៀត សំដៅគាំទ្រ​កំណើន​សេដ្ឋកិច្ចប្រកបដោយចីរភាព៕ អត្ថបទ៖ រ៉ាឌី