អធិការបតី លោក Friedrich Merz បាននិយាយកាលពីថ្ងៃចន្ទ ទី៣០ ខែមីនា ថា ប្រទេសអាល្លឺម៉ង់ និងស៊ីរី នឹងធ្វើការរួមគ្នាដើម្បីបញ្ជូនជនភៀសខ្លួនស៊ីរីរាប់ម៉ឺននាក់ ជាអ្នកដែលលោកបាននិយាយថាមានតួនាទីសំខាន់ក្នុងការកសាងប្រទេសរបស់ពួកគេឡើងវិញ។

ថ្លែងបន្ទាប់ពីជំនួបជាមួយប្រធានាធិបតីស៊ីរី លោក Ahmed al-Sharaa នៅទីក្រុងប៊ែរឡាំង លោក Merz បាននិយាយថា ប្រហែល៨០% នៃជនជាតិស៊ីរីនៅក្នុងប្រទេសអាល្លឺម៉ង់ ជាកន្លែងដែលមនុស្សប្រហែល ៧០០.០០០ ទៅ៨០០.០០០នាក់កំពុងស្វែងរកសិទ្ធិជ្រកកោន ត្រូវបានគេរំពឹងថានឹងវិលត្រឡប់ទៅប្រទេសកំណើតរបស់ពួកគេវិញក្នុងរយៈពេលបីឆ្នាំខាងមុខ។

លោក Merz និយាយថា «សង្គ្រាមស៊ីវិលចប់ហើយ»។ រដ្ឋាភិបាលចម្រុះរបស់លោក បានដាក់ចេញនូវការគ្រប់គ្រងកាន់តែតឹងរ៉ឹង នៅពេលបានឡើងកាន់អំណាចកាលពីឆ្នាំមុន ខណៈការគាំទ្រសម្រាប់គណបក្សប្រឆាំងអន្តោប្រវេសន៍ AfD បានកើនឡើងបន្ទាប់ពីការសម្រេចចិត្តរបស់អតីតអធិការបតី លោកស្រី Angela Merkel ក្នុងការទទួលយកអ្នកស្វែងរកសិទ្ធិជ្រកកោនប្រហែល ១លាននាក់មកពីប្រទេសនានា រួមទាំងប្រទេសស៊ីរី និងអាហ្វហ្គានីស្ថាន។

លោក Merz បាននិយាយថា អាល្លឺម៉ង់ចង់គាំទ្រដំណើរការកសាងឡើងវិញនៅក្នុងប្រទេសស៊ីរី ហើយកំពុងធ្វើការជាមួយរដ្ឋាភិបាលទីក្រុងដាម៉ាស ដើម្បីជួយអ្នកដែលមានបំណងវិលត្រឡប់ទៅប្រទេសវិញ។ លោក Al-Sharaa បាននិយាយថា ប្រទេសស៊ីរីនឹងមិនភ្លេចពីរបៀបដែលប្រទេសអាល្លឺម៉ង់បានបើកទ្វាររបស់ខ្លួនទទួលយកជនភៀសខ្លួនក្នុងអំឡុងសង្គ្រាមស៊ីវិលនោះទេ និងបាននិយាយថា ប្រទេសទាំងពីរកំពុងស្តារភាពជាដៃគូរបស់ខ្លួនឡើងវិញ។