ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃចន្ទ (៣០ មីនា) ថា សម្ព័ន្ធមិត្តមួយចំនួនរបស់អ៊ុយក្រែនបានផ្ញើ «សញ្ញា» ទៅកាន់ទីក្រុងគីវ អំពីលទ្ធភាពនៃការកាត់បន្ថយការវាយប្រហាររយៈចម្ងាយឆ្ងាយលើវិស័យប្រេងរបស់រុស្ស៊ី ខណៈតម្លៃថាមពលសកលបានហក់ឡើងខ្ពស់ ដោយសារតែជម្លោះនៅតំបន់មជ្ឈិមបូព៌ា។

ថ្លែងទៅកាន់អ្នកសារព័ត៌មានតាមរយៈកម្មវិធីផ្ញើសារ WhatsApp លោក Zelenskyy បាននិយាយថា អ៊ុយក្រែនត្រៀមខ្លួនរួចជាស្រេចក្នុងការឆ្លើយតបដូចគ្នា ប្រសិនបើរុស្ស៊ី បញ្ឈប់ការវាយប្រហារលើប្រព័ន្ធថាមពលរបស់អ៊ុយក្រែន ហើយទីក្រុងគីវ ក៏បើកចំហចំពោះបទឈប់បាញ់ក្នុងឱកាសបុណ្យអ៊ីស្ទើរ (Easter) ផងដែរ។

លោក Zelenskyy បានលើកឡើងថា៖ «នាពេលថ្មីៗនេះ បន្ទាប់ពីមានវិបត្តិថាមពលពិភពលោកដ៏ធ្ងន់ធ្ងរបែបនេះ អ៊ុយក្រែនពិតជាទទួលបានសញ្ញាមួយចំនួនពីដៃគូរបស់ខ្លួនថា ឱ្យកាត់បន្ថយការឆ្លើយតបនៅក្នុងវិស័យប្រេង និងវិស័យថាមពលនៃសហព័ន្ធរុស្ស៊ី»។

ប្រភពមួយដែលដឹងរឿងនេះបាននិយាយថា មន្ត្រីអាមេរិកបានបញ្ជូនសារនេះទៅកាន់សមភាគីអ៊ុយក្រែន ជាផ្នែកនៃកិច្ចសន្ទនាជាធម្មតារបស់ភាគីទាំងពីរ ដោយបានបន្ថែមថា «សញ្ញា» ដំបូងហាក់ដូចជាមានប្រភពមកពីទីក្រុងមូស្គូ។ សង្គ្រាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់ បានបង្កភាពរង្គោះរង្គើដល់ការផ្គត់ផ្គង់ប្រេង ឧស្ម័ន និងផលិតផលចម្រាញ់ជាអន្តរជាតិ ដែលនាំឱ្យតម្លៃហក់ឡើងខ្ពស់ ក្រោមការរំខានដល់ការផ្គត់ផ្គង់ថាមពលដ៏អាក្រក់បំផុតក្នុងប្រវត្តិសាស្ត្រ៕