រុស្ស៊ី បានរាយការណ៍កាលពីថ្ងៃចន្ទថា កងកម្លាំងរបស់ខ្លួនដណ្តើមបានការគ្រប់គ្រងទីតាំងលំនៅឋានចំនួនពីរកន្លែងនៅក្នុងតំបន់ Kharkov និង Zaporizhzhia ក្នុងរយៈពេល ២៤ ម៉ោងកន្លងទៅនេះ ខណៈអ៊ុយក្រែនអះអាងថាបានរារាំងការប៉ុនប៉ងរបស់រុស្ស៊ីក្នុងការរុលទៅមុខកាន់តែជ្រៅទៅក្នុងទឹកដីរបស់ខ្លួន។ នៅក្នុងរបាយការណ៍ប្រចាំថ្ងៃ ក្រសួងការពារជាតិរុស្ស៊ី បាននិយាយថា ក្នុងរយៈពេលមួយថ្ងៃកន្លងទៅនេះ កងកម្លាំងរុស្ស៊ី បានវាយប្រហារអាកាសយានដ្ឋានយោធា ទីតាំងហេដ្ឋារចនាសម្ព័ន្ធថាមពល និងទីតាំងបង្ហោះយានដ្រូនរយៈចម្ងាយឆ្ងាយរបស់កងកម្លាំងប្រដាប់អាវុធអ៊ុយក្រែន។

ក្រសួងការពារជាតិនិយាយថា កងកម្លាំងរុស្ស៊ី បានវាយប្រហារចំណុចដាក់ពង្រាយបណ្តោះអាសន្ននៃកងកម្លាំងប្រដាប់អាវុធអ៊ុយក្រែន និងទាហានស៊ីឈ្នួលបរទេស ហើយអង្គភាពការពារដែនអាកាសរុស្ស៊ី បានបាញ់ទម្លាក់យានដ្រូនចំនួន ៣១២ គ្រឿង។ នៅថ្ងៃដដែលនោះ នាយសេនាធិការនៃកងកម្លាំងប្រដាប់អាវុធអ៊ុយក្រែន បានរាយការណ៍ថា ការប៉ះទង្គិចគ្នាចំនួន ១៤៧លើក បានកើតឡើងតាមបណ្តោយសមរភូមិមុខ មួយថ្ងៃកន្លងទៅនេះ។ កងកម្លាំងអ៊ុយក្រែន បានធ្វើឲ្យកងកម្លាំងរុស្ស៊ីបាត់បង់រួមមានទាំងបុគ្គលិក និងសម្ភារៈ។ លើសពីនេះ កងទ័ពអ៊ុយក្រែនបានកំណត់គោលដៅលើតំបន់ប្រមូលផ្តុំបុគ្គលិកចំនួនបីកន្លែង និងសម្ភារៈរបស់រុស្ស៊ី ព្រមទាំងចំណុចត្រួតពិនិត្យយានដ្រូនមួយកន្លែង និងបានបាញ់ទម្លាក់យានដ្រូនជាង ២.៤០០ គ្រឿង នេះបើយោងតាមការចុះផ្សាយរបស់ទីភ្នាក់ងារសារព័ត៌មាន។

ប្រធានាធិបតីអ៊ុយក្រែន លោក Volodymyr Zelenskiy បាននិយាយថា អ៊ុយក្រែនបានត្រៀមខ្លួនរួចជាស្រេចដើម្បីបង្កើតបទឈប់បាញ់ជាមួយរុស្ស៊ី។ លោកបានសង្កត់ធ្ងន់ថា អ៊ុយក្រែនគាំទ្រទម្រង់ណាមួយសម្រាប់ការបញ្ចប់ជម្លោះ ដែលរក្សាភាពថ្លៃថ្នូរ និងឯករាជ្យភាពរបស់ប្រទេស រួមទាំងបទឈប់បាញ់ពេញលេញ និងបម្រាមវាយប្រហារលើហេដ្ឋារចនាសម្ព័ន្ធថាមពល។