យោងតាមមន្ត្រីអាមេរិក មន្រ្តីតំបន់ឈូងសមុទ្រ និងមន្រ្តីអ៊ីស្រាអែល បានប្រាប់ប្រព័ន្ធផ្សព្វផ្សាយថា បណ្តាសម្ព័ន្ធមិត្តតំបន់ឈូងសមុទ្ររបស់ទីក្រុងវ៉ាស៊ីនតោន ដែលដឹកនាំដោយអារ៉ាប៊ីសាអ៊ូឌីត និងអារ៉ាប់រួម កំពុងជំរុញឱ្យលោកប្រធានាធិបតី Donald Trump បន្តយុទ្ធនាការសង្គ្រាមប្រឆាំងនឹងអ៊ីរ៉ង់ ដោយលើកហេតុផលថា ទីក្រុងតេអេរ៉ង់នៅមិនទាន់ចុះខ្សោយគ្រប់គ្រាន់នៅឡើយទេ ក្រោយយុទ្ធនាការទម្លាក់គ្រាប់បែករយៈពេលជាង ១ខែមកនេះ។

នៅដើមសង្គ្រាម សម្ព័ន្ធមិត្តទាំងនោះរអ៊ូរទាំជាលក្ខណៈឯកជនថា ពួកគេមិនទទួលបានដំណឹងជាមុនឱ្យបានត្រឹមត្រូវអំពីការវាយប្រហាររួមគ្នារវាងអាមេរិក និងអ៊ីស្រាអែល ហើយត្អូញត្អែរថា អាមេរិកបានព្រងើយកន្តើយចំពោះការព្រមានរបស់ពួកគេថា សង្គ្រាមនឹងមានផលវិបាកដ៏មហន្តរាយសម្រាប់តំបន់ទាំងមូល។ ប៉ុន្តែពេលនេះ សម្ព័ន្ធមិត្តក្នុងតំបន់មួយចំនួន កំពុងលើកហេតុផលប្រាប់សេតវិមានថា ពេលវេលានេះគឺជាឱកាសដ៏ប្រវត្តិសាស្ត្រក្នុងការកម្ទេចរបបដឹកនាំបែបសាសនារបស់អ៊ីរ៉ង់ឱ្យអស់ជាស្ថាពរ។

ប្រភពទាំងនោះបានឱ្យដឹងទៀតថា មន្ត្រីមកពីអារ៉ាប៊ីសាអ៊ូឌីត អារ៉ាប់រួម កូវ៉ែត និងបារ៉ែន បានបញ្ជាក់ក្នុងកិច្ចសន្ទនាជាលក្ខណៈឯកជនថា ពួកគេមិនចង់ឱ្យប្រតិបត្តិការយោធានេះបញ្ចប់ឡើយ រហូតទាល់តែមានការផ្លាស់ប្តូរដ៏សំខាន់នៅក្នុងជួរថ្នាក់ដឹកនាំអ៊ីរ៉ង់ ឬមានការផ្លាស់ប្តូរឥរិយាបថរបស់អ៊ីរ៉ង់យ៉ាងខ្លាំងក្លាបំផុត ពោលគឺការបរាជ័យទាំងស្រុង។

ការជំរុញពីបណ្តាប្រទេសក្នុងតំបន់ឈូងសមុទ្រនេះ កើតឡើងក្នុងពេលដែលលោក Trump កំពុងស្ទាក់ស្ទើររវាងការអះអាងថា ថ្នាក់ដឹកនាំអ៊ីរ៉ង់បានត្រៀមខ្លួនរួចរាល់ក្នុងការដោះស្រាយជម្លោះ និងការគំរាមកំហែងថានឹងពង្រីកសង្គ្រាមបន្ថែមទៀត ប្រសិនបើកិច្ចព្រមព្រៀងមិនអាចសម្រេចបានក្នុងពេលឆាប់ៗ។ សង្គ្រាមនេះបានសម្លាប់មនុស្សអស់ជាង ៣.០០០ នាក់ហើយនៅទូទាំងមជ្ឈិមបូព៌ា និងកំពុងអង្រួនសេដ្ឋកិច្ចពិភពលោក៕