កាលពីថ្ងៃចន្ទ (៣០ មីនា) ប្រធានាធិបតីអេហ្ស៊ីប លោក Abdel Fattah al-Sisi បានជំរុញឱ្យប្រធានាធិបតីអាមេរិក លោក Donald Trump បញ្ឈប់សង្គ្រាមជាមួយអ៊ីរ៉ង់ ដោយលើកឡើងថា មានតែលោក Trump ប៉ុណ្ណោះដែលអាចធ្វើរឿងនេះបាន ហើយក៏ព្រមានថា ភាពភ័យខ្លាចចំពោះតម្លៃប្រេងដែលអាចហក់ឡើងលើស ២០០ដុល្លារ ក្នុងមួយបារ៉ែល មិនមែនជារឿងបំផ្លើសនោះទេ។

លោក Sisi បានថ្លែងនៅក្នុងសន្និសីទពិព័រណ៍ថាមពលអេហ្ស៊ីបឆ្នាំ២០២៦ ក្នុងទីក្រុងគែរថា៖ «លោកសូមប្រាប់ទៅកាន់ប្រធានាធិបតី Trump ថា៖ ពុំមាននរណាម្នាក់អាចបញ្ឈប់សង្គ្រាមក្នុងតំបន់ឈូងសមុទ្រនេះបានឡើយ ក្រៅពីលោក Trump» ដោយទទូចឱ្យសហរដ្ឋអាមេរិក បញ្ឈប់ជម្លោះនេះ។

អេហ្ស៊ីប ដែលជាអ្នកទទួលជំនួយយោធាពីអាមេរិក និងការគាំទ្រពីបណ្ដាប្រទេសមានទ្រព្យនៅតំបន់ឈូងសមុទ្រជាយូរមកហើយនោះ ក៏បានថ្កោលទោសការវាយប្រហាររបស់អ៊ីរ៉ង់ លើបណ្តាប្រទេសអារ៉ាប់នៅតំបន់ឈូងសមុទ្រ និងបានជំរុញកិច្ចប្រឹងប្រែងផ្នែកការទូត ដើម្បីបញ្ចៀសសង្គ្រាមក្នុងតំបន់កុំឱ្យកាន់តែរីកធំឡើង។ កាលពីខែមីនា មន្ត្រីយោធាអ៊ីរ៉ង់បានព្រមានថា តម្លៃប្រេងពិភពលោកអាចហក់ឡើងដល់ ២០០ដុល្លារក្នុងមួយបារ៉ែល ដោយយោងទៅលើអស្ថិរភាពក្នុងតំបន់ដែលបង្កឡើងដោយសកម្មភាពរបស់អាមេរិក និងអ៊ីស្រាអែល។

លោក Sisi បានប្រាប់សន្និសីទពិព័រណ៍នោះថា សង្គ្រាមនឹងបង្កឱ្យមានផលប៉ះពាល់ទ្វេដង គឺការខ្វះខាតការផ្គត់ផ្គង់ និងការឡើងថ្លៃទំនិញ ដែលទំហំនៃផលប៉ះពាល់ទាំងស្រុងមិនទាន់ត្រូវបានដឹងនៅឡើយទេ។ លោកបានបន្ថែមថា អ្នកតាមដានទីផ្សារបានព្រមានថា «តម្លៃប្រេងមួយបារ៉ែលអាចឡើងដល់លើស ២០០ដុល្លារ ហើយនេះមិនមែនជារឿងបំផ្លើសនោះឡើយ»៕