អ្នកសម្របសម្រួលពិសេសរបស់អង្គការសហប្រជាជាតិសម្រាប់ប្រទេសលីបង់ លោកស្រី Jeanine Hennis-Plasschaert កាលពីថ្ងៃចន្ទ បានអំពាវនាវឲ្យមានបទឈប់បាញ់ជាបន្ទាន់រវាងក្រុមហេសបូឡា និងអ៊ីស្រាអែល ដោយព្រមានថា ជម្លោះដ៏អូសបន្លាយ អាចបណ្តាលឲ្យខូចខាតដែលមិនអាចត្រឡប់វិញបានចំពោះស្ថិរភាព និងវិបុលភាពរបស់ប្រទេសនេះ។

នៅក្នុងសេចក្តីថ្លែងការណ៍មួយ លោកស្រី Hennis-Plasschaert បាននិយាយថា កងកម្លាំងរក្សាសន្តិភាពអង្គការសហប្រជាជាតិចំនួនបីនាក់ ត្រូវបានសម្លាប់ នៅភាគខាងត្បូងប្រទេសលីបង់ក្នុងរយៈពេល ២៤ ម៉ោងកន្លងមក ហើយគ្រូពេទ្យលីបង់ចំនួន ៩នាក់ បានស្លាប់ ក្នុងរយៈពេលតែមួយថ្ងៃប៉ុណ្ណោះ កាលពីចុងសប្តាហ៍។

លោកស្រីបាននិយាយថា ចំនួនអ្នកស្លាប់ដោយសារអរិភាពកាន់តែខ្លាំងឡើងរវាងក្រុមហេសបូឡា និងអ៊ីស្រាអែល បានកើនឡើងដល់ ១.២៤៧នាក់ រួមទាំងបុគ្គលិកសុខាភិបាល អ្នកសារព័ត៌មាន ជនស៊ីវិល និងទាហានលីបង់ដែលមិនពាក់ព័ន្ធនឹងការប្រយុទ្ធគ្នា។

មន្ត្រីអង្គការសហប្រជាជាតិ បាននិយាយថា ប្រទេសលីបង់បានក្លាយជា «ស្រមោលនៃអ្វីដែលខ្លួនធ្លាប់មានពីមុន» ដោយផ្នែកខ្លះនៃប្រទេសនេះ ត្រូវបានក្លាយទៅជាគំនរបាក់បែក និងទីក្រុងខ្មោច ហើយចំនួនអ្នកផ្លាស់ទីលំនៅលើសពី ១,២ លាននាក់។

លោកស្រី បានអំពាវនាវឲ្យមានបទឈប់បាញ់ជាបន្ទាន់ វិធានការកសាងទំនុកចិត្តជាមូលដ្ឋាន កិច្ចខិតខំប្រឹងប្រែងកាន់តែខ្លាំងឡើងដោយប្រទេសលីបង់ ដើម្បីគ្រប់គ្រងការសម្រេចចិត្តសង្គ្រាម និងសន្តិភាពរបស់ខ្លួន និងការចាប់ផ្តើមកិច្ចចរចារវាងប្រទេសលីបង់ និងអ៊ីស្រាអែល៕