អ៊ីរ៉ង់បានបាញ់មីស៊ីលថ្មីនៅព្រឹកព្រលឹមថ្ងៃអង្គារ (ទី៣១ ខែមីនា ឆ្នាំ២០២៦) នេះ ខណៈដែលប្រទេសនេះបានប្ដេជ្ញាមិនព្រមចុះញ៉ម ចំពោះលោកប្រធានាធិបតីអាមេរិក Donald Trump ដែលបានគំរាមកំហែងបំផ្លាញមជ្ឈមណ្ឌលនាំចេញប្រេងរបស់ប្រទេស នៅកោះ Kharg រួមជាមួយរោងចក្រថាមពល និងរោងចក្រចម្រាញ់ទឹកប្រៃ ប្រសិនបើទីក្រុងតេអេរ៉ង់មិនទទួលយកកិច្ចព្រមព្រៀង ដើម្បីបញ្ចប់សង្គ្រាមទេនោះ។

នាយករដ្ឋមន្ត្រីអ៊ីស្រាអែល លោក Benjamin Netanyahu ដែលជាដៃគូរបស់លោក Trump ក្នុងការវាយប្រហារអ៊ីរ៉ង់ បាននិយាយថា គោលដៅយោធាជាងពាក់កណ្តាលរបស់លោក សម្រេចបានហើយ ប៉ុន្តែមេដឹកនាំទាំង២ បានបដិសេធមិនកំណត់ពេលវេលា នៅក្នុងប្រតិបត្តិការដែលបានបញ្ឆេះឲ្យមានភ្លើងសង្គ្រាម ក្នុងតំបន់ និងបានធ្វើឲ្យតម្លៃប្រេងសកលហក់ឡើងខ្ពស់។

នៅទីក្រុង Dubai របស់ប្រទេសអេមីរ៉ាតអារ៉ាប់រួម មនុស្ស ៤នាក់ បានរងរបួសនៅព្រឹកព្រលឹមថ្ងៃនេះ ដោយសារបំណែកមីស៊ីលដែលត្រូវបានស្ទាក់ចាប់ ហើយនាវាដឹកប្រេង ១គ្រឿង នៅកំពង់ផែរបស់គុយវ៉ែត បានកើតមានអគ្គិភ័យ។ នេះបើយោងតាមអាជ្ញាធរនៅក្នុងមជ្ឈមណ្ឌលហិរញ្ញវត្ថុដែលមានកេរ្តិ៍ឈ្មោះដោយសារស្ថិរភាព និងដែលត្រូវបានរង្គោះរង្គើដោយសង្គ្រាមជាង ១ខែ។

ដោយបដិសេធមិនព្រមចុះចាញ់ គណៈកម្មាធិការសភាអ៊ីរ៉ង់ បានបោះឆ្នោតយកថ្លៃឈ្នួល លើនាវា នៅក្នុងច្រកសមុទ្រ Hormuz ជាផ្លូវដែលប្រេង ១ភាគ៥នៃពិភពលោកឆ្លងកាត់ និងហាមឃាត់ទាំងស្រុងនូវនាវាពីសហរដ្ឋអាមេរិក និងអ៊ីស្រាអែល។ ច្រកសមុទ្រនេះបានបើកមុនសង្គ្រាម ប៉ុន្តែរដ្ឋមន្ត្រីការបរទេសអាមេរិក លោក Marco Rubio ថ្មីៗនេះ បានលើកឡើងអំពីការបង្កើត «សម្ព័ន្ធភាព» ដើម្បីប្រឆាំងនឹងផែនការយកថ្លៃឈ្នួលរបស់អ៊ីរ៉ង់។

លោក Trump បាននិយាយថា សហរដ្ឋអាមេរិកកំពុងជជែកជាមួយ «របបសមហេតុផលជាងមួយ» នៅទីក្រុងតេអេរ៉ង់ ដែលបានបដិសេធមិនមានការចរចាណាមួយ ហើយបានចោទប្រកាន់លោកថា និយាយកុហកអំពីការចរចា ដើម្បីជាការបិទបាំង ខណៈពេលដែលកំពុងរៀបចំការឈ្លានពានផ្លូវគោក។ លោក Trump បានព្រមានថា ប្រសិនបើកិច្ចព្រមព្រៀងមួយ មិនត្រូវបានសម្រេច រួមទាំងការបើកច្រកសមុទ្រ Hormuz ឡើងវិញ កងកម្លាំងអាមេរិក នឹងបំផ្លាញ «រោងចក្រផលិតអគ្គិសនីទាំងអស់របស់ពួកគេ អណ្តូងប្រេង និងកោះ Kharg (និងប្រហែលជារោងចក្រចម្រាញ់ទឹកប្រៃទាំងអស់!)»៕