រដ្ឋមន្ត្រីការបរទេសសហរដ្ឋអាមេរិក លោក Marco Rubio បាននិយាយថា សហរដ្ឋអាមេរិកប្រហែលជាត្រូវវាយតម្លៃឡើងវិញនូវទំនាក់ទំនងរបស់ខ្លួនជាមួយអង្គការណាតូ (NATO) បន្ទាប់ពីសង្គ្រាមអ៊ីរ៉ង់ត្រូវបានបញ្ចប់ ដោចាត់ទុកកង្វះការគាំទ្ររបស់សម្ព័ន្ធមិត្តយោធាមួយនេះ ក្នុងអំឡុងពេលមានជម្លោះមជ្ឈិមបូព៌ាថា ជាទង្វើ «គួរឲ្យខកចិត្តយ៉ាងខ្លាំង»។

លោក Rubio បានរិះគន់សមាជិកអង្គការណាតូធ្ងន់ៗ ចំពោះការបដិសេធមិនឲ្យចូលប្រើប្រាស់មូលដ្ឋានយោធា បន្ទាប់ពីមានការស្ដីបន្ទោសនៅមុននេះពីប្រធានាធិបតី លោក Donald Trump ដែលថា ដៃគូនៅក្នុងអង្គការសន្ធិសញ្ញាអាត្លង់ទិកខាងជើងនេះ គឺ «ខ្វះភាពក្លាហាន» ហើយសម្ព័ន្ធភាពនេះ គឺគ្រាន់តែជា «ខ្លាក្រដាស»។

លោក Rubio បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Al Jazeera ថា៖ «លោកប្រធានាធិបតី និងប្រទេសរបស់យើង នឹងត្រូវពិនិត្យឡើងវិញនូវរឿងទាំងអស់នេះ បន្ទាប់ពីប្រតិបត្តិការនេះបានបញ្ចប់។ ប្រសិនបើអង្គការណាតូ គ្រាន់តែមាន ដើម្បីការពារអឺរ៉ុប ប្រសិនបើពួកគេត្រូវបានវាយប្រហារ ប៉ុន្តែពួកគេបដិសេធសិទ្ធិមូលដ្ឋានរបស់យើង នៅពេលដែលយើងត្រូវការពួកគេ នោះមិនមែនជាការរៀបចំដ៏ល្អឡើយ។ នោះជាការរៀបចំដ៏លំបាកមួយ ក្នុងការបន្តការចូលរួម»។

សមាជិកនៃអង្គការណាតូភាគច្រើន បានបដិសេធសំណើរបស់លោក Trump ក្នុងការឲ្យជួយបើកច្រកសមុទ្រ Hormuz ដ៏សំខាន់ឡើងវិញ ដែលអ៊ីរ៉ង់បានបិទ ជាមួយនឹងការគំរាមកំហែងសងសឹក បន្ទាប់ពីត្រូវបានវាយប្រហារដោយសហរដ្ឋអាមេរិក និងអ៊ីស្រាអែល។ ផ្លូវឆ្លងកាត់ដ៏សំខាន់ សម្រាប់ការផ្គត់ផ្គង់ថាមពល ត្រូវបានបិទចាប់តាំងពីចុងខែកុម្ភៈ ដែលនាំឲ្យតម្លៃប្រេង និងឧស្ម័នហក់ឡើងខ្ពស់ខ្លាំង៕