នៅថ្ងៃអង្គារ (ទី៣១ ខែមីនា ឆ្នាំ២០២៦) នេះ នាយករដ្ឋមន្ត្រីជប៉ុន លោកស្រី Sanae Takaichi បានលើកឡើងថា ប្រទេសជប៉ុន និងឥណ្ឌូនេស៊ីបានព្រមព្រៀងគ្នាបង្កើនការសម្របសម្រួល លើសន្តិសុខថាមពល ខណៈដែលសង្គ្រាម រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់ បានផ្ដល់ការលំបាកខ្លាំងឡើងៗដល់ការផ្គត់ផ្គង់ប្រេង និងឧស្ម័នសំខាន់ៗ សម្រាប់តំបន់អាស៊ី ។

រួមជាមួយប្រធានាធិបតីឥណ្ឌូនេស៊ី លោក Prabowo Subianto បន្ទាប់ពីថ្នាក់ដឹកនាំទាំង២ បានជួបពិភាក្សាគ្នា នៅទីក្រុងតូក្យូ លោកស្រី Takaichi បាននិយាយថា៖ «ដោយសារស្ថានភាព នៅប្រទេសអ៊ីរ៉ង់ សារៈសំខាន់ជាយុទ្ធសាស្ត្រនៃធនធាន និងសន្តិសុខថាមពល កំពុងត្រូវបានទទួលស្គាល់ជាសកលម្តងទៀត។ ឥណ្ឌូនេស៊ីគឺជាប្រទេសសម្បូរធនធានដ៏សំខាន់មួយ»។

ជំនួបកំពូលនេះកើតឡើងស្របពេលមានការព្រួយបារម្ភកាន់តែខ្លាំងឡើងៗ អំពីជម្លោះដែលកំពុងរីករាលដាល នៅតំបន់មជ្ឈិមបូព៌ា ដែលបានរំខានដល់ការដឹកជញ្ជូនប្រេង និងឧស្ម័នតាមរយៈច្រកសមុទ្រដ៏សំខាន់ គឺ Hormuz។

ឥណ្ឌូនេស៊ីគឺជាប្រទេសនាំចេញធ្យូងថ្មកម្ដៅធំជាងគេបំផុតរបស់ពិភពលោក សម្រាប់ការផលិតថាមពល ដោយផ្គត់ផ្គង់ប្រហែលពាក់កណ្តាលនៃការនាំចេញសកល។ ប្រទេសនេះក៏ជាអ្នកនាំចេញឧស្ម័នធម្មជាតិរាវដ៏សំខាន់មួយផងដែរ ដោយមានប្រហែល ១ភាគ៤នៃការដឹកជញ្ជូនរបស់ខ្លួនឆ្ពោះទៅជប៉ុន។

លោក Prabowo បាននិយាយថា ប្រទេសជប៉ុន និងឥណ្ឌូនេស៊ី នឹង «ប្រឹងប្រែងឲ្យអស់ពីសមត្ថភាព ដើម្បីបញ្ចុះបញ្ចូលគ្រប់ភាគីទាំងអស់ (នៅមជ្ឈិមបូព៌ា) បន្ថយភាពតានតឹង» នៅក្នុងជម្លោះនេះ។

យ៉ាងណាក្ដី មេដឹកនាំទាំង២ មិនបានផ្តល់សេចក្ដីលម្អិតអំពីថា តើប្រទេសទាំង២ នឹងសម្របសម្រួលក្នុងសន្តិសុខសេដ្ឋកិច្ចនោះយ៉ាងដូចម្ដេច៕