ក្រុមអាជ្ញាធរនិយាយថា ភ្លៀងធ្លាក់ខ្លាំងបង្កជាទឹកជំនន់ធ្ងន់ធ្ងរ និងបំណាក់ដី បានសម្លាប់មនុស្សយ៉ាងហោច ៤៥នាក់ នៅប្រទេសអាហ្វហ្គានីស្ថាន និងប៉ាគីស្ថាន ក្នុងរយៈពេលជាង ៥ថ្ងៃកន្លងមកនេះ ។

អាជ្ញាធរគ្រប់គ្រងគ្រោះមហន្តរាយជាតិអាហ្វហ្គានីស្ថាននិយាយកាលពីថ្ងៃចន្ទថា មនុស្ស ២៨នាក់ ត្រូវបានសម្លាប់ នៅក្នុងទឹកជំនន់ ហើយមនុស្ស ៤៩នាក់ផ្សេងទៀត បានរងរបួស ក្នុងនោះផ្ទះប្រជាពលរដ្ឋជាង ១០០ខ្នង ត្រូវបានបំផ្លិចបំផ្លាញ ។

ភាគច្រើននៃអ្នកស្លាប់ក្នុងប្រទេសអាហ្វហ្គានីស្ថាន ត្រូវបានគេរាយការណ៍ថា កើតមាននៅខេត្តភាគកណ្តាល និងខេត្តភាគខាងកើត រួមមានខេត្ត Parwan, Maidan Wardak, Daikundi និងខេត្ត Logar ។

ក្រុមអាជ្ញានិយាយនៅក្នុងសេចក្តីថ្លែងការណ៍ថា ស្ថានភាពអាកាសធាតុបន្តអស្ថិរភាពនៅតាមតំបន់ជាច្រើនទូទាំងប្រទេសអាហ្វហ្គានីស្ថាន ហើយហានិភ័យនៅតែបន្តមាន សម្រាប់ភ្លៀងធ្លាក់ខ្លាំង និងទឹកជំនន់នៅតាមតំបន់មួយចំនួន ។ ពលរដ្ឋសរុប ១.១៤០គ្រួសារ បានរងផលប៉ះពាល់ដោយសារគ្រោះមហន្តរាយធម្មជាតិនេះ ។

ដោយឡែកនៅខេត្ត Khyber Pakhtunkhwa របស់ប៉ាគីស្ថាន ដែលជាប់ព្រំដែនអាហ្វហ្គានីស្ថាន មនុស្ស ១៧នាក់ ត្រូវបានសម្លាប់ ហើយមនុស្ស ៥៦នាក់ផ្សេងទៀត បានរងរបួស ៕