ប្រទេសនានា នៅក្នុងអង្គការពាណិជ្ជកម្មពិភពលោក (WTO) បានបរាជ័យក្នុងការឈានដល់ការព្រមព្រៀងគ្នា ស្ដីពីមាគ៌ាកំណែទម្រង់ ឬសូម្បីតែការពង្រីកការផ្អាកជាធម្មតានូវការតព្វកិច្ចពន្ធពាណិជ្ជកម្មតាមប្រព័ន្ធអេឡិចត្រូនិក ឬពាណិជ្ជកម្មអនឡាញ ដែលជំរុញឲ្យមានការប្ដេជ្ញាជាថ្មីពីសហរដ្ឋអាមេរិក ក្នុងការស្វែងរកកិច្ចព្រមព្រៀងផ្សេងជាមួយប្រទេសដែលមានគំនិតដូចគ្នា និងធ្វើឲ្យតួនាទីរបស់ស្ថាប័ននេះមានកម្រិត ក្នុងគោលនយោបាយពាណិជ្ជកម្មសកល។

ការជជែកពិភាក្សារយៈពេល ៤ថ្ងៃ ក្នុងចំណោមរដ្ឋមន្ត្រីពាណិជ្ជកម្ម នៅរដ្ឋធានី Yaounde របស់ប្រទេសកាមេរូន បានបញ្ចប់ទៅដោយមានការខ្វែងគំនិតគ្នា នាព្រឹកព្រលឹមថ្ងៃចន្ទ (ទី៣០ ខែមីនា ឆ្នាំ២០២៦) ដោយប្រេស៊ីល និងទួរគី រារាំងកិច្ចប្រឹងប្រែង ក្នុងការពង្រីកការលើកលែងពន្ធពាណិជ្ជកម្មអេឡិចត្រូនិករបស់ WTO ក្នុងនោះរួមមានទាំងការទាញយកកម្មវិធីឌីជីថល និងការផ្សាយតាមប្រព័ន្ធអ៊ីនធឺណិត។ ការផ្អាកបណ្ដោះអាសន្ននោះ ដែលបានព្រមព្រៀងគ្នា នៅពេលអ៊ីនធឺណិតចាប់ផ្ដើមមានការប្រើប្រាស់កាន់តែច្រើនដំបូង បានផុតកំណត់ជាលើកដំបូង ក្នុងរយៈពេល ២៨ឆ្នាំ។

តំណាងពាណិជ្ជកម្មអាមេរិក លោក Jamieson Greer បានលើកឡើងនៅក្នុងសេចក្តីថ្លែងការណ៍មួយថា លោកទទួលបានកិច្ចព្រមព្រៀងពីប្រទេសរាប់សិប រួមទាំងដៃគូពាណិជ្ជកម្មសំខាន់ៗស្ទើរតែទាំងអស់ មិនឲ្យដាក់កាតព្វកិច្ចពន្ធ លើការផ្ទេរឌីជីថលរបស់សហរដ្ឋអាមេរិកទេ។

លោក Greer បានប្ដេជ្ញាថា ប្រសិនបើ WTO បរាជ័យក្នុងការស្តារការលើកលែងនេះឡើងវិញ «សហរដ្ឋអាមេរិកនឹងធ្វើការនៅខាងក្រៅ WTO ជាមួយដៃគូដែលចាប់អារម្មណ៍ទាំងអស់ ដើម្បីធ្វើឲ្យដំណើរការនោះ សម្រេចបាន»៕