អ្នកស្រី Josephine Angev គឺជាអ្នកស្ម័គ្រចិត្តវ័យ ៤០ឆ្នាំម្នាក់ ដែលដើរពីផ្ទះមួយទៅផ្ទះមួយនៅតាមសង្កាត់ក្នុងរដ្ឋ Benue ប្រទេសនីហ្សេរីយ៉ា ជាមួយនឹងបេកកម្មដ៏ចាំបាច់ ដើម្បីនាំយកថ្នាំពន្យាអាយុជីវិតដល់អ្នកជំងឺកើតមេរោគហ៊ីវ បន្ទាប់ពីការបញ្ឈប់ជំនួយសហរដ្ឋអាមេរិកកាលពីដើមឆ្នាំ ២០២៥ បានធ្វើឲ្យមនុស្សរាប់ម៉ឺននាក់ គ្មានថ្នាំព្យាបាល ។

អ្នកស្រី Angev គឺជាផ្នែកមួយនៃក្រុមការងាររបស់ក្រុម African Community Advisory Board ដែលជាក្រុមស្ម័គ្រចិត្តមេរោគហ៊ីវមិនរកប្រាក់ចំណេញ ដើម្បីកាត់បន្ថយផលវិបាកនៃការបង្កកជំនួយបរទេសរបស់សហរដ្ឋអាមេរិករយៈពេល ៩០ថ្ងៃ កាលពីខែមករា ឆ្នាំ ២០២៥ ក្រោមរដ្ឋបាលរបស់លោកប្រធានាធិបតី Donald Trump ។

ការបង្កកនេះ បានធ្វើឲ្យអាក់ខានដល់បណ្តាញព្យាបាលមេរោគហ៊ីវរបស់នីហ្សេរីយ៉ា ផ្តល់មូលនិធិសំខាន់ដោយគម្រោងសង្រ្គោះបន្ទាន់អ្នកកើតជំងឺអេដស៍(PEPFAR) ដែលបានរួមចំណែកថ្លៃព្យាបាលមេរោគហ៊ីវរហូតដល់ ៩០ភាគរយនៅក្នុងប្រទេសនីហ្សេរីយ៉ា ។

អ្នកស្រី Angev និយាយថា ពួកគេមួយចំនួនពុំបានដឹងនោះឡើយថាតើហេតុអ្វីបានជាពួកគេ ត្រូវបានពន្យាពេលការព្យាបាលបែបនេះ ពីព្រោះពួកគេពុំបានដឹងពីមូលហេតុនោះទេ ។

អ្នកស្រីបន្តថា ដូច្នេះហើយពេលពួកយើងដើរគោះទ្វារផ្ទះរបស់ពួកគេ ហើយពន្យល់ពីសារៈសំខាន់នៃការព្យាបាល បានពួកគេយល់កាន់តែច្បាស់ ។

ការផ្អាកជំនួយនេះដែរ បានធ្វើឲ្យមានកង្វះខាតសកល ហើយនិងការបិទមណ្ឌលសុខភាព ។ នៅរដ្ឋធានី Makurdi ស្ថិតក្នុងរដ្ឋ Benue មណ្ឌលព្យាបាលទាំង ១០កន្លែង បានបិទអស់រយៈពេល ១០ខែ ។ អ្នកជំងឺដែលធ្លាប់ទទួលបានការផ្គត់ផ្គង់រយៈពេល ៦ខែ បច្ចុប្បន្នទទួលបានថ្នាំពន្យាអាយុជីវិតត្រឹម ១សប្តាហ៍ ឬ ២សប្តាហ៍ប៉ុណ្ណោះ ខណៈអ្នកជំងឺខ្លះទៀត គ្មានថ្នាំព្យាបាលតែម្តង ៕