ក្រសួងការបរទេសទីក្រុងប៉េកាំង នៅថ្ងៃអង្គារ (ទី៣១ ខែមីនា ឆ្នាំ២០២៦) នេះ បានប្រាប់ឲ្យដឹងថា ចិន និងប៉ាគីស្ថាន នឹង «ពង្រឹង» កិច្ចសហប្រតិបត្តិការរបស់ប្រទេសទាំង២ ជុំវិញបញ្ហាអ៊ីរ៉ង់ ខណៈដែលមន្ត្រីជាន់ខ្ពស់ទីក្រុងអ៊ីស្លាម៉ាបាដ បានទៅទស្សនកិច្ចរដ្ឋធានីរបស់ចិន។

ប្រទេសជិតខាងអាស៊ីទាំង២ បានប្រឹងប្រែងជួយសម្របសម្រួល នៅតំបន់មជ្ឈិមបូព៌ា ដើម្បីទប់ស្កាត់ជម្លោះកុំឲ្យកើនឡើង ដោយទីក្រុងអ៊ីស្លាម៉ាបាដលើកឡើងថា ខ្លួនបានត្រៀមរួចជាស្រេចហើយ ដើម្បីធ្វើជាម្ចាស់ផ្ទះនៃ «កិច្ចពិភាក្សាដ៏មានអត្ថន័យ» រវាងសហរដ្ឋអាមេរិក និងអ៊ីរ៉ង់។

រដ្ឋមន្ត្រីការបរទេសប៉ាគីស្ថាន លោក Ishaq Dar ដែលមានតួនាទីឧបនាយករដ្ឋមន្ត្រីផងដែរនោះ កំពុងធ្វើទស្សនកិច្ច នៅទីក្រុងប៉េកាំង ជាកន្លែងដែលលោកនឹងជួបជាមួយអ្នកការទូតជាន់ខ្ពស់ចិន លោក Wang Yi សម្រាប់កិច្ចពិភាក្សា ស្ដីពីបញ្ហាអន្តរជាតិ និងទ្វេភាគី។

ដោយចាត់ទុកប្រទេសចិន និងប៉ាគីស្ថានថា ជាដៃគូយុទ្ធសាស្ត្រ «គ្រប់កាលៈទេសៈ» អ្នកនាំពាក្យក្រសួងការបរទេសប៉េកាំង លោកស្រី Mao Ning បានប្រាប់សន្និសីទសារព័ត៌មានថា៖ «រដ្ឋមន្ត្រីការបរទេសទាំង២ នឹងលើកកម្ពស់ទំនាក់ទំនង និងការសម្របសម្រួលជាយុទ្ធសាស្ត្រ ជុំវិញស្ថានភាពអ៊ីរ៉ង់ និងធ្វើកិច្ចប្រឹងប្រែងថ្មីឆ្ពោះទៅរកការគាំទ្រឲ្យមានសន្តិភាព»។

ទស្សនកិច្ចរបស់លោក Dar បានកើតឡើងបន្ទាប់ពីលោកបានទទួលសមភាគីរបស់លោកមកពីប្រទេសអារ៉ាប៊ីសាអ៊ូឌីត អេហ្ស៊ីប និងទួរគី កាលពីថ្ងៃអាទិត្យចុងសប្ដាហ៍កន្លងមក ដើម្បីពិភាក្សាអំពីកិច្ចប្រឹងប្រែងបញ្ចប់សង្គ្រាម នៅតំបន់មជ្ឈិមបូព៌ា ដែលត្រូវបានបង្កឡើងដោយការវាយប្រហាររបស់សហរដ្ឋអាមេរិក-អ៊ីស្រាអែល លើអ៊ីរ៉ង់ កាលពីថ្ងៃទី២៨ ខែកុម្ភៈ៕