ក្រុមជួយសង្រ្គោះនៅរដ្ឋធានី Accra របស់ប្រទេសហ្គាណា នាំគ្នាស្វែងរកអ្នករស់រាន ក្រោយហេតុការណ៍បាក់អគារមិនទាន់បញ្ចប់ការសាងសង់រួចមួយខ្នងដែលត្រូវបានគេប្រើប្រាស់ធ្វើជាព្រះវិហារ ។

រដ្ឋមន្រ្តីក្រសួងមហាផ្ទៃហ្គាណាលោក Muntaka Mohammed-Mubarak និយាយថា មនុស្សរាប់សិបនាក់នៅក្នុងអគារ ពេលឧបទ្ទេវហេតុកើតឡើងកាលពីថ្ងៃអាទិត្យ ។

លោកនិយាយថា អ្វីដែលពួកយើងអាចនិយាយបាននៅពេលនេះ គឺមនុស្សសរុប ២៣នាក់ នៅក្នុងអគារ ហើយមនុស្ស ៣នាក់ បានស្លាប់ ដែលជាបុរសម្នាក់ និងស្រ្តី ២នាក់ ហើយអរគុណព្រះដែលមនុស្ស ២០នាក់ នៅរស់ ហើយបច្ចុប្បន្ន ពួកគេកំពុងសម្រាកព្យាបាលនៅក្នុងមន្ទីរពេទ្យ ។

សាក្សីម្នាក់និយាយថា ពួកគេកំពុងធ្វើពិធីបួងសួង ពេលដែលលោកចាកចេញពីព្រះវិហារ ប៉ុន្តែក្រោយពេលអគាបាក់ លោកលែងឮសំឡេងបួងសួងទៀតហើយ ។ លោកបន្តថា ប្រហែលជាពួកគេបន្តនៅក្នុងអគារនោះ ពេលដែលអគារបាក់ ដូច្នេះហើយលោកក៏បានទូរស័ព្ទហៅនគរបាល ។

សូមបញ្ជាក់ថា ហេតុការណ៍បាក់អគារគឺជាបញ្ហាកើតឡើងញឹកញាប់នៅក្នុងប្រទេសហ្គាណា ហើយការបាក់អគារទាំងនេះ ជាប់ពាក់ព័ន្ធនឹងការមិនគោរពបទដ្ឋានសាងសង់ឲ្យបានត្រឹមត្រូវ ហើយនិងការប្រើប្រាស់សំណង់អគារដែលមិនទាន់បញ្ចប់ការសាងសង់រួចរាល់ជាស្ថាពរ ៕