ការសិក្សាថ្មីមួយរបស់អង្គការសហប្រជាជាតិ (UN) បានរកឃើញថា សង្គ្រាមរបស់សហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់ អាចបំផ្លាញកំណើនសេដ្ឋកិច្ចជិត ២០០ពាន់លានដុល្លារ នៅទូទាំងតំបន់មជ្ឈិមបូព៌ា។

យោងតាមការវិភាគរបស់កម្មវិធីអភិវឌ្ឍន៍អង្គការសហប្រជាជាតិ (UNDP) អំពីផលវិបាកសេដ្ឋកិច្ច និងសង្គម សម្រាប់បណ្ដារដ្ឋអារ៉ាប់ ដែលត្រូវបានចេញផ្សាយនៅព្រឹកថ្ងៃអង្គារ (ទី៣១ ខែមីនា ឆ្នាំ២០២៦) នេះ បានឲ្យដឹងថា ប្រទេសអារ៉ាប់អាចខាតបង់ចន្លោះពី ១២០ពាន់លានដុល្លារ ទៅ ១៩៤ពាន់លានដុល្លារ ក្នុងផលិតផលក្នុងស្រុកសរុប (GDP) ដោយសារតែការរំខានពីសង្គ្រាម។

ទីភ្នាក់ងារនេះបានលើកឡើងថា ខ្លួនបានសិក្សាពីសេណារីយ៉ូផ្សេងៗគ្នាមួយចំនួន ដើម្បីកំណត់ពីរបៀបនៃជម្លោះ ដែលបានចាប់ផ្តើមកាលថ្ងៃទី២៨ ខែកុម្ភៈ អាចប៉ះពាល់ដល់ប្រទេសនានានៅក្នុងតំបន់។ អ្នកនិពន្ធនៃរបាយការណ៍នេះ បានបង្ហាញថា ការខូចខាតអាចធ្ងន់ធ្ងរ ទោះបីជាសង្គ្រាមបញ្ចប់ក្នុងពេលឆាប់ៗនេះក៏ដោយ។ អ្នកទាំងនោះបានបញ្ជាក់ថា៖ «ការកើនឡើងនូវភាពតានតឹងផ្នែកយោធារយៈពេលខ្លី នៅតំបន់មជ្ឈិមបូព៌ា អាចបង្កជាផលប៉ះពាល់ដល់សេដ្ឋកិច្ចសង្គមយ៉ាងធ្ងន់ធ្ងរ និងរីករាលដាលនៅទូទាំងតំបន់រដ្ឋអារ៉ាប់»។

ការខាតបង់សរុបអាចបណ្តាលឲ្យអត្រាគ្មានការងារធ្វើក្នុងតំបន់ កើនឡើងរហូតដល់ ៤ភាគរយ ដែលធ្វើឲ្យបាត់បង់ការងារប្រហែល ៣,៦លានកន្លែង និងរុញឲ្យមនុស្សរហូតដល់ ៤លាននាក់ធ្លាក់ចូលទៅក្នុងភាពក្រីក្រ។ នេះបើយោងតាមរបាយការណ៍នោះ។

លោក Abdallah Al Dardari ជំនួយការអគ្គលេខាធិការ UN ដែលដឹកនាំការិយាល័យ UNDP នៅរដ្ឋអារ៉ាប់ បាននិយាយនៅក្នុងសេចក្តីថ្លែងការណ៍មួយថា៖ «វិបត្តិនេះបន្លឺសញ្ញាអាសន្ន សម្រាប់ប្រទេសនានាក្នុងតំបន់»៕