សេតវិមានបានឲ្យដឹងថា យុទ្ធនាការយោធារបស់សហរដ្ឋអាមេរិក ប្រឆាំងនឹងអ៊ីរ៉ង់ កំពុង «ដំណើរការដោយជោគជ័យ» ខណៈដែលទីក្រុងវ៉ាស៊ីនតោន បានបង្ហាញទាំងការមានប្រៀបនៅសមរភូមិដែលកំពុងកើនឡើង និងការចរចាជាបន្តបន្ទាប់ជាមួយទីក្រុងតេអេរ៉ង់។

អ្នកនាំពាក្យ លោកស្រី Karoline Leavitt បាននិយាយថា ប្រតិបត្តិការ Epic Fury កំពុងដំណើរការ «តាមផែនការ» ដោយកងកម្លាំងអាមេរិក បានបង្កើនការមានប្រៀបរបស់ពួកគេលើអ្វីដែលលោកស្រីបានពិពណ៌នាថា ជា «របបភេរវករអ៊ីរ៉ង់»។

តែទន្ទឹមនឹងនោះ លោកស្រី Leavitt ក៏បានប្រាប់ផងដែរថា ការចរចាការទូត កំពុងដំណើរការ និង «ដំណើរការទៅយ៉ាងល្អ» ទោះបីជាមានសារផ្ទុយជាសាធារណៈពីទីក្រុងតេអេរ៉ង់ក៏ដោយ ដោយបន្ថែមថា មន្ត្រីអ៊ីរ៉ង់ហាក់ដូចជាបានបង្ហាញនូវ «ភាពសមហេតុផលជាងមុន» នៅក្នុងការពិភាក្សាសម្ងាត់។

លោកស្រីបានឲ្យដឹងទៀតថា ប្រធានាធិបតីអាមេរិក Donald Trump បានចេញការផ្អាករយៈពេល ១០ថ្ងៃ សម្រាប់ការវាយប្រហារដែលបានគ្រោងទុក ដែលផ្តោតលើរោងចក្រថាមពល និងហេដ្ឋារចនាសម្ព័ន្ធថាមពលរបស់អ៊ីរ៉ង់ ដោយចាត់ទុកថា នេះគឺជា «ឱកាសកម្រមានក្នុងមួយជំនាន់» ដើម្បីឲ្យអ៊ីរ៉ង់ឈានដល់កិច្ចព្រមព្រៀង។

កិច្ចព្រមព្រៀងដែលបានស្នើឡើងនោះ នឹងតម្រូវឲ្យទីក្រុងតេអេរ៉ង់បោះបង់ចោលមហិច្ឆតានុយក្លេអ៊ែររបស់ខ្លួនជាអចិន្ត្រៃយ៍ និងបញ្ឈប់សកម្មភាពដែលទីក្រុងវ៉ាស៊ីនតោនពិពណ៌នាថា ជាការធ្វើឲ្យមានអស្ថិរភាពនៅក្នុងតំបន់៕