ក្រុមថែរក្សាសន្តិភាព ២នាក់ទៀតរបស់ឥណ្ឌូនេស៊ី ត្រូវបានសម្លាប់នៅក្នុងការផ្ទុះមួយនៅតំបន់ភាគខាងត្បូងលីបង់កាលពីថ្ងៃចន្ទ ធ្វើឲ្យចំនួនជនជាតិឥណ្ឌូនេស៊ីស្លាប់កើនឡើងដល់ ៣នាក់ ក្រោយទាហានម្នាក់ទៀត ត្រូវបានសម្លាប់នៅក្នុងឧបទ្ទេវហេតុដាច់ដោយឡែក កាលពីរយៈពេល ១ថ្ងៃមុន ។

បេសកកម្មថែរក្សាសន្តិភាពអង្គការសហប្រជាជាតិនៅលីបង់(UNIFIL) និយាយកាលពីថ្ងៃចន្ទថា អ្នកថែរក្សាសន្តិភាពម្នាក់របស់ឥណ្ឌូនេស៊ី ត្រូវបានសម្លាប់ នៅពេលដែលកាំជ្រួចផ្លោងបានផ្ទុះនៅលើទីតាំងឈរជើងរបស់ពួកគេ ជិតភូមិ Adchit al-Qusayr ស្ថិតនៅភាគខាងត្បូងប្រទេសលីបង់កាលពីថ្ងៃអាទិត្យ ។

ពួកគេគឺជាមនុស្សស្លាប់ដំបូងនៅក្នុងចំណោមកងកម្លាំងថែរក្សាសន្តិភាពអង្គការសហប្រជាជាតិ(UN)នៅក្នុងសង្រ្គាមថ្មីរវាងអ៊ីស្រាអែល និងក្រុមប្រដាប់អាវុធលីបង់ហេសបូឡា ដែលបានចាប់ផ្តើមឡើងកាលពីថ្ងៃទី ២ ខែមីនា ។

UNនិយាយថា ឧបទ្ទេវហេតុកាលពីថ្ងៃចន្ទ បណ្តាលឲ្យទាហានឥណ្ឌូនេស៊ី ២នាក់ រងរបួសផងដែរ ពេលដែលការផ្ទុះពុំដឹងប្រភព បានបំផ្លាញរថយន្តរបស់ពួកគេនៅទីក្រុង Bani Hayyan ។

ការផ្ទុះនេះ បានវាយប្រហារក្បួនរថយន្តភស្តុភារនៅតំបន់ប្រតិបត្តិការសឹករបស់ទាហានឥណ្ឌូនេស៊ីកាលពីវេលាម៉ោង ១១ព្រឹក ម៉ោងក្នុងស្រុកថ្ងៃចន្ទ ។

ការផ្ទុះនេះបានត្រូវចំរថយន្តដំបូងគេនៃក្បួនរថយន្ត ៦គ្រឿងពេលដែលពួកគេត្រឡប់មកវិញ ដោយបានសម្លាប់ទាហាន ២នាក់ និងបណ្តាលឲ្យទាហាន ២នាក់ផ្សេងទៀត រងរបួសនៅក្នុងរថយន្ត ។ ក្បួនរថយន្តនេះ ស្ថិតក្នុងបេសកកម្មចែកចាយភស្តុភារ និងដឹកក្តារមឈូសសម្រាប់ទាហានម្នាក់ដែលត្រូវបានសម្លាប់កាលពីរយៈពេល ១ថ្ងៃមុន ។

ឥណ្ឌូនេស៊ី បានថ្កោលទោសការវាយប្រហារដោយកាំភ្លើងធំកាលពីថ្ងៃអាទិត្យ ដែលបានកើតឡើងនៅជិតមូលដ្ឋានទ័ព UNIFIL ៕