ទីភ្នាក់ងារសារព័ត៌មានរុស្ស៊ី បានស្រង់សម្តីក្រសួងការពារជាតិ នៅព្រលឹមថ្ងៃពុធ (១ មេសា) នេះថា យន្តហោះដឹកជញ្ជូនយោធារុស្ស៊ី ប្រភេទ An-26 មួយគ្រឿង បានធ្លាក់បុកនឹងច្រាំងថ្មភ្នំក្នុងតំបន់គ្រីម៉េ (Crimea) ដែលបណ្តាលឱ្យមនុស្ស ២៩ នាក់នៅលើនោះ បានស្លាប់បាត់បង់ជីវិត។

ភ្នាក់ងារសារព័ត៌មាន TASS ដោយផ្អែកលើប្រភពពីក្រសួងការពារជាតិរុស្ស៊ី បានឱ្យដឹងថា ទីតាំងធ្លាក់ត្រូវបានរកឃើញនៅក្នុងតំបន់គ្រីម៉េ ដែលជាឧបទ្វីបលយចូលទៅក្នុងសមុទ្រខ្មៅ ហើយត្រូវបានរុស្ស៊ីកាត់យកពីអ៊ុយក្រែនក្នុងឆ្នាំ២០១៤។ 

សារព័ត៌មាន TASS បាននិយាយដោយសម្អាងដល់របាយការណ៍នៅកន្លែងកើតហេតុថា៖ «យន្តហោះ AN-26 ដែលបានដាច់ការទាក់ទងកាលពីម៉ោងក្នុងស្រុក ៦ល្ងាចថ្ងៃអង្គារ បានធ្លាក់បុកនឹងច្រាំងថ្មភ្នំ។ អ្នកដំណើរ ២៣នាក់ និងបុគ្គលិក ៦នាក់ បានស្លាប់»។ របាយការណ៍ប្រព័ន្ធផ្សព្វផ្សាយមិនបានបញ្ជាក់ពីចំនួនមនុស្សសរុបនៅលើនោះទេ ប៉ុន្តែក៏មិនបានលើកឡើងពីអ្នករស់រានមានជីវិតដែរ។ យន្តហោះ An-26 ជាយន្តហោះដឹកជញ្ជូនយោធាយុទ្ធសាស្ត្រធុនស្រាល ដែលអាចដឹកជញ្ជូនទំនិញ និងអ្នកដំណើររហូតដល់ ៤០នាក់ ក្នុងចម្ងាយខ្លី និងមធ្យម។

ដោយឡែក ភ្នាក់ងារសារព័ត៌មាន RIA របស់រុស្ស៊ី បានបញ្ជាក់ថា យោងតាមការវាយតម្លៃបឋម បញ្ហាបច្ចេកទេសត្រូវបានគេជឿថាជាមូលហេតុដែលបង្កឱ្យមានការធ្លាក់យន្តហោះនេះ៕