ឆ្មាំបដិវត្តន៍អ៊ីរ៉ង់ បាននិយាយកាលពីថ្ងៃអង្គារ ទី៣១ ខែមីនា ថា ពួកគេនឹងកំណត់គោលដៅលើក្រុមហ៊ុនបច្ចេកវិទ្យាឈានមុខរបស់សហរដ្ឋអាមេរិក ដូចជាក្រុមហ៊ុន Apple, Google និង Meta ប្រសិនបើមេដឹកនាំអ៊ីរ៉ង់បន្ថែមទៀតត្រូវបានសម្លាប់នៅក្នុង «ការធ្វើឃាតដែលត្រូវបានដាក់គោលដៅ»។

កងឆ្មាំបាននិយាយនៅក្នុងសេចក្តីថ្លែងការណ៍មួយមានរាយឈ្មោះក្រុមហ៊ុនចំនួន១៨ក្រុមហ៊ុន ដែលខ្លួនបានចោទប្រកាន់មានជាប់ពាក់ព័ន្ធក្នុងការសម្លាប់មន្ត្រីថា «ក្រុមហ៊ុនទាំងនេះ ដោយចាប់ផ្តើមពីម៉ោង ៨យប់ ម៉ោងនៅទីក្រុងតេអេរ៉ង់នៅថ្ងៃពុធ ទី១ ខែមេសា រំពឹងថានឹងមានការបំផ្លាញអង្គភាពពាក់ព័ន្ធរបស់ពួកគេជាថ្នូរនឹងការធ្វើឃាតនៅក្នុងប្រទេសអ៊ីរ៉ង់»។

សេចក្តីថ្លែងការណ៍និយាយថា «យើងណែនាំបុគ្គលិករបស់ស្ថាប័នទាំងនេះឱ្យចាកចេញពីកន្លែងធ្វើការរបស់ពួកគេជាបន្ទាន់ដើម្បីរស់រានជីវិត»។ ការគំរាមកំហែង ធ្វើឡើងនៅពេលដែលប្រធានាធិបតីសហរដ្ឋអាមេរិក លោក Donald Trump និយាយថា លោកកំពុងផ្តល់ផ្នែកការទូតក្នុងគោលបំណងបញ្ចប់ជម្លោះ ខណៈក៏គំរាមកំហែងពង្រីកយុទ្ធនាការរបស់សហរដ្ឋអាមេរិកនិងអ៊ីស្រាអែល ប្រឆាំងនឹងសាធារណរដ្ឋអ៊ីស្លាមមួយនេះ ផងដែរ។ សេចក្តីថ្លែងការណ៍របស់កងឆ្មាំបាននិយាយថា រដ្ឋាភិបាលសហរដ្ឋអាមេរិក និងក្រុមហ៊ុនបច្ចេកវិទ្យាយក្ស «បានធ្វើព្រងើយចំពោះការព្រមានដដែលៗរបស់យើងទាក់ទងនឹងភាពចាំបាច់»នៃការបញ្ឈប់ប្រតិបត្តិការដែលកំណត់គោលដៅលើមន្ត្រីកំពូលៗរបស់អ៊ីរ៉ង់ ដោយចោទប្រកាន់ថា ក្រុមហ៊ុនបច្ចេកវិទ្យាទាំងនោះគឺជា «ធាតុសំខាន់ក្នុងការរៀបចំ និងតាមដានគោលដៅការធ្វើឃាត»។

សេចក្តីថ្លែងការណ៍និយាយថា ក្រុមហ៊ុនទាំង ១៨ ដែលរួមមានទាំងក្រុមហ៊ុន Intel, Microsoft និង Oracle ព្រមទាំងក្រុមហ៊ុនផលិតរថយន្តអគ្គិសនី Tesla ក្រុមហ៊ុនវិភាគ Palantir និងក្រុមហ៊ុនបន្ទះអេឡិចត្រូនិកយក្ស Nvidia ប្រឈមនឹងការសងសឹក។