បន្ទាប់ពីប្រព័ន្ធផ្សព្វផ្សាយរដ្ឋអ៊ីរ៉ង់រាយការណ៍ថា កងកម្លាំងឆ្មាំបដិវត្តន៍ បានគំរាមកំណត់គោលដៅលើក្រុមហ៊ុនអាមេរិកនៅតំបន់មជ្ឈិមបូព៌ា ចាប់ពីថ្ងៃទី១ ខែមេសា នេះតទៅ ដើម្បីសងសឹកចំពោះការវាយប្រហារលើអ៊ីរ៉ង់ រដ្ឋបាលអាមេរិកបានឆ្លើយតបទៅវិញដោយនិយាយថា យោធាអាមេរិកបានត្រៀមខ្លួនរួចជាស្រេចហើយដើម្បីទប់ស្កាត់ការឈ្លានពានទាំងឡាយណាដែលអាចកើតមានពីទីក្រុងតេអេរ៉ង់។

មន្រ្តីសេតវិមានមួយរូបប្រាប់សារព័ត៌មានរ៉យទ័រថា «យោធាអាមេរិកបានត្រៀមខ្លួនរួចជាស្រេចដើម្បីទប់ស្កាត់រាល់ការវាយប្រហារណាមួយដោយអ៊ីរ៉ង់ ដូចដែលបានបង្ហាញឱ្យឃើញច្បាស់តាមរយៈការកម្ទេច ៩០% នៃការវាយប្រហារដោយមីស៊ីលបាលីស្ទិក និងយានដ្រូនដោយរបបភេរវករ»។

កងឆ្មាំបដិវត្តន៍អ៊ីរ៉ង់ (IRGC) បានព្រមានថាខ្លួននឹងកំណត់គោលដៅលើក្រុមហ៊ុនបច្ចេកវិទ្យាអាមេរិក ប្រសិនបើមេដឹកនាំអ៊ីរ៉ង់ជាច្រើនរូបទៀតត្រូវបានសម្លាប់នៅក្នុង «ការកំណត់គោលដៅធ្វើឃាត»។ សេចក្ដីថ្លែការណ៍របស់កងឆ្មាំបដិវត្តន៍បាននិយាយថា៖ «ក្រុមហ៊ុនទាំងនេះ ដោយចាប់ផ្តើមពីម៉ោង ៨:០០ យប់ ម៉ោងនៅទីក្រុងតេអេរ៉ង់ នៅថ្ងៃពុធ ទី១ ខែមេសា គួរតែរំពឹងថានឹងមានការបំផ្លាញអង្គភាពពាក់ព័ន្ធរបស់ពួកគេ ដោយសារការធ្វើឃាតនៅអ៊ីរ៉ង់» ដោយរាយបញ្ជីឈ្មោះក្រុមហ៊ុនចំនួន ១៨ស្ថាប័ន ដែលខ្លួនចោទប្រកាន់ថាបានជាប់ពាក់ព័ន្ធក្នុងការសម្លាប់មន្ត្រីអ៊ីរ៉ង់។

ការព្រមាននេះមិនបានបញ្ជាក់ថាសកម្មភាពកំណត់គោលដៅនឹងធ្វើនៅទីណាទេ ដោយគ្រាន់តែនិយាយថា «អ្នកស្រុកនៅជុំវិញក្រុមហ៊ុនទាំងនេះនៅគ្រប់ប្រទេសទាំងអស់ក្នុងតំបន់ត្រូវបានណែនាំឱ្យចាកចេញទៅកន្លែងសុវត្ថិភាព»៕