ភាគហ៊ុនអាស៊ីបានកើនឡើងនៅថ្ងៃពុធ១មេសាសប្ដាហ៍នេះ បន្ទាប់ពីប្រធានាធិបតីអាមេរិកលោក Donald Trump បាននិយាយថាសង្គ្រាមមជ្ឈិមបូព៌ានឹងបញ្ចប់ក្នុងរយៈពេលបីសប្តាហ៍ខាងមុខ ហើយសមភាគីអ៊ីរ៉ង់របស់លោកបាននិយាយថាទីក្រុងតេអេរ៉ង់មានឆន្ទៈបញ្ចប់សង្គ្រាមនេះឲ្យបានឆាប់។

ប៉ុន្តែខណៈការអត្ថាធិប្បាយពីមេដឹកនាំទាំងពីរបានផ្តល់ក្តីសង្ឃឹមសម្រាប់ការបញ្ចប់វិបត្តិរយៈពេលមួយជាងមួយខែ តម្លៃប្រេងឆៅបានកើនឡើងដោយសារតែការព្រួយបារម្ភពីការបិទច្រកសមុទ្រយុទ្ធសាស្ត្រHormuz។

ការអត្ថាធិប្បាយទាំងនេះក៏កើតឡើងផងដែរ ខណៈផលប៉ះពាល់សេដ្ឋកិច្ចនៃជម្លោះកាន់តែធ្ងន់ធ្ងរ ដោយតម្លៃប្រេងសាំងជាមធ្យមរបស់សហរដ្ឋអាមេរិកឡើងដល់ ៤ ដុល្លារក្នុងមួយហ្គាឡុងជាលើកដំបូងក្នុងរយៈពេលបួនឆ្នាំ អតិផរណានៅអឺរ៉ុបកើនឡើង ហើយរដ្ឋាភិបាលនានា បានបង្ហាញវិធានការគាំទ្រជាច្រើន។

នៅអាស៊ី ភាគហ៊ុនSeoulរបស់កូរ៉េខាងត្បូង ដែលស្ថិតក្នុងចំណោមទីក្រុងនានារងផលប៉ះពាល់ខ្លាំងបំផុតចាប់តាំងពីសង្គ្រាមអាមេរិក -អ៊ីរ៉ង់ បានចាប់ផ្តើមផ្ទុះឡើង បានកើនឡើងជាង៦ ភាគរយ ខណៈភាគហ៊ុន Tokyo របស់ជប៉ុន និង Taipei របស់កោះតៃវ៉ាន់ កើនឡើងយ៉ាងហោចណាស់ ៤ %។

សន្ទស្សន៍ភាគហ៊ុន Straits Times របស់សិង្ហបុរីបានកើនឡើងជាង ១% ខណៈ Bursa Malaysia បានកើនឡើង០,៧%គិតត្រឹមម៉ោង ១០:២០នាទី ព្រឹកថ្ងៃពុធនេះ។

សន្ទស្សន៍ភាគហ៊ុន Hang Sengរបស់ទីក្រុងហុងកុង បានកើនឡើងជិត ២%។

ចំណែកផ្សារភាគហ៊ុនរបស់អាមេរិក Wall Street បានកើនឡើង ហើយភាគហ៊ុន Nasdaq បានកើនឡើង ៣,៨% និងភាកហ៊ុន S&P 500 បានកើនឡើងជិត ៣%៕