ប្រធានាធិបតីអ៊ុយក្រែន លោក Volodymyr Zelenskyy បាននិយាយថា លោកនឹងស្នើសុំឱ្យអ្នកសម្របសម្រួលសហរដ្ឋអាមេរិក បញ្ជូនសំណើរបស់លោកអំពីបទឈប់បាញ់នៅថ្ងៃបុណ្យ Easter ទៅរុស្ស៊ី ដោយបញ្ឈប់ការវាយប្រហារលើរោងចក្រថាមពលរបស់ប្រទេស ក្នុងពេលមានការជាប់គាំងដែលនៅបន្តជុំវិញការចរចាសន្តិភាព។

ថ្លែងកាលពីថ្ងៃអង្គារនៅខាងក្រៅព្រឹត្តិការណ៍មួយដើម្បីប្រារព្ធខួបបួនឆ្នាំនៃការសម្លាប់រង្គាលនៅទីក្រុង Bucha របស់អ៊ុយក្រែន លោក Zelenskyy បាននិយាយថា លោកនឹង «ផ្តល់សំណើនេះយ៉ាងពិតប្រាកដ» ទៅសហរដ្ឋអាមេរិកក្នុងពេលសន្ទនាតាមអនឡាញជាមួយបេសកជនសហរដ្ឋអាមេរិក លោក Steve Witkoff និងលោក Jared Kushner ដែលនឹងធ្វើនៅថ្ងៃពុធនេះ។ លោកបាននិយាយថា «ខ្ញុំពិតជានឹងស្នើសុំឱ្យពួកគេបញ្ជូនសំណើទៅឲ្យភាគីរុស្ស៊ី» ដែលក្នុងនោះ ស្ថានភាពនៃការចរចាសន្តិភាពសម្របសម្រួលដោយសហរដ្ឋអាមេរិកជាមួយរុស្ស៊ីដែលបានជាប់គាំង នឹងត្រូវបានពិភាក្សា។ «យើងត្រៀមខ្លួនរួចជាស្រេចសម្រាប់បទឈប់បាញ់នៅថ្ងៃឈប់សម្រាកបុណ្យ Easter យើងត្រៀមខ្លួនរួចជាស្រេចសម្រាប់ការសម្របសម្រួលណាមួយ លើកលែងតែការសម្របសម្រួលនោះពាក់ព័ន្ធនឹងសេចក្តីថ្លៃថ្នូរ និងដែនអធិបតេយ្យភាពរបស់យើង»។

អ្នកនាំពាក្យវិមានក្រឹមឡាំង លោក Dmitry Peskov បានប្រតិកម្មចំពោះការចរចាកាលពីពេលមុនរបស់លោក Zelenskyy អំពីបទឈប់បាញ់ស្តីពីថាមពល។ «ពីសេចក្តីថ្លែងការណ៍របស់លោក Zelenskyy ដែលយើងបានអាន យើងមិនទាន់បានឃើញគំនិតផ្តួចផ្តើមណាមួយដែលបង្កើតឡើងច្បាស់លាស់សម្រាប់បទឈប់បាញ់នៅថ្ងៃបុណ្យ Easter នោះទេ»។ «យើងសូមបញ្ជាក់ជាថ្មីថា៖ លោក Zelenskyy ត្រូវតែទទួលខុសត្រូវ និងធ្វើការសម្រេចចិត្តសមស្រប ដើម្បីឱ្យយើងអាចទទួលបានបានសន្តិភាព ពុំមែនបទឈប់បាញ់ទេ»។ ការផ្តល់សំណើរបស់លោក Zelenskyy បានធ្វើឡើងមួយថ្ងៃបន្ទាប់ពីលោកបាននិយាយថា សម្ព័ន្ធមិត្តមួយចំនួនរបស់ប្រទេសលោកបានបញ្ជូន «សញ្ញា» ទៅទីក្រុងគីវ អំពីលទ្ធភាពនៃការកាត់បន្ថយការវាយប្រហារចម្ងាយឆ្ងាយរបស់ខ្លួនលើវិស័យប្រេងរបស់រុស្ស៊ី ខណៈតម្លៃថាមពលសកលកើនឡើង។