លោកស្រី Haneen Sayed រដ្ឋមន្ត្រីក្រសួងសង្គមកិច្ចរបស់ប្រទេសលីបង់ បាននិយាយកាលពីថ្ងៃអង្គារ ទី ៣១ ខែមីនា ថា ប្រទេសលីបង់កំពុងត្រៀមទប់ទល់សម្រាប់លទ្ធភាពដែលមនុស្សរាប់ម៉ឺននាក់ត្រូវជម្លៀសខ្លួនដោយការវាយប្រហាររបស់អ៊ីស្រាអែល និងបទបញ្ជាជម្លៀស ដែលនឹងមិនវិលត្រឡប់ទៅលំនៅឋានវិញក្នុងរយៈពេលយូរ។

លោកស្រី Sayed បាននិយាយទៅកាន់ទីភ្នាក់ងារសារព័ត៌មានរ៉យទ័រ បន្ទាប់ពីរដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយថា យោធានឹងបំផ្លាញលំនៅឋានទាំងអស់តាមបណ្តោយព្រំដែនប្រទេសលីបង់ជាមួយអ៊ីស្រាអែល និងហាមឃាត់ប្រជាជនចំនួន ៦០០.០០០នាក់ដែលបានភៀសខ្លួនចេញពីភាគខាងត្បូងប្រទេសលីបង់ មិនឱ្យវិលត្រឡប់ទៅភូមិរបស់ពួកគេវិញ។ មនុស្សជាងមួយលាននាក់ បានភៀសខ្លួនចេញពីលំនៅឋានរបស់ពួកគេ ហើយមនុស្ស ១.២០០ក់ផ្សេងទៀតត្រូវបានសម្លាប់នៅក្នុងការវាយប្រហាររបស់អ៊ីស្រាអែលចាប់តាំងពីថ្ងៃទី២ ខែមីនា នៅពេលដែលក្រុមប្រដាប់អាវុធលីបង់ ហេសបូឡា បានទាញប្រទេសលីបង់ឲ្យធ្លាក់ចូលក្នុងជម្លោះក្នុងតំបន់ដោយការបាញ់ផ្លោងទៅលើប្រទេសអ៊ីស្រាអែល។

   លោកស្រី Sayed បាននិយាយកាលពីថ្ងៃអង្គារថា «ការជម្លៀសខ្លួនរយៈពេលវែង គឺជាអ្វីដែលយើងព្រួយបារម្ភ។ យើងសង្ឃឹមថាវាមិនកើតឡើងទេ ប៉ុន្តែក្នុងនាមរដ្ឋាភិបាល យើងត្រូវរៀបចំ និងគិតអំពីបញ្ហានេះ»។ រដ្ឋាភិបាលលីបង់កំពុងពិចារណាជម្រើស រួមទាំងកម្មវិធីផ្តល់ប្រាក់សម្រាប់ជួល និងផ្តល់កន្លែងជាក់ស្តែងដែលប្រជាជនអាចទៅបាន ប៉ុន្តែពុំមានគម្រោងសាងសង់ជំរំនៅក្នុងដំណាក់កាលនេះទេ។