រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃអង្គារ (៣១ មីនា) បាននិយាយថា ត្រូវតែមានដំណាក់កាលអន្តរកាលមួយនៅក្នុងប្រទេសវ៉េណេស៊ុយអេឡា ហើយប្រទេសនេះច្បាស់ជានឹងត្រូវមានការបោះឆ្នោតដោយសេរី និងយុត្តិធម៌ ប៉ុន្តែលោកបន្ថែមថា ចាំបាច់ត្រូវមានការអត់ធ្មត់បន្តិចរហូតដល់ឈានដល់ចំណុចនោះ។

ថ្លែងនៅក្នុងបទសម្ភាសន៍មួយនៅលើកម្មវិធីទូរទស្សន៍ Fox News លោក Rubio បាននិយាយថា «នៅទីបំផុត ត្រូវតែមានដំណាក់កាលអន្តរកាលមួយ ត្រូវតែមានការបោះឆ្នោតដោយសេរី និងយុត្តិធម៌នៅវ៉េណេស៊ុយអេឡា។ ហើយចំណុចនោះត្រូវតែមកដល់ គ្រាន់តែត្រូវរង់ចាំបន្តិចប៉ុណ្ណោះ»។

គួររម្លឹកថា យោធាសហរដ្ឋអាមេរិក បានចាប់ខ្លួនអតីតប្រធានាធិបតីវ៉េណេស៊ុយអេឡា លោក Nicolas Maduro ក្នុងការវាយឆ្មក់ដ៏រហ័សមួយនៅរដ្ឋធានីការ៉ាកាស កាលពីដើមខែមករាកន្លងទៅ ក្រោមបទបញ្ជារបស់លោកប្រធានាធិបតីអាមេរិក Donald Trump។ ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា ប្រតិបត្តិការវាយឆ្មក់នេះគឺជាការរំលោភលើច្បាប់អន្តរជាតិ។

នៅពេលនោះ លោក Trump ធ្លាប់បាននិយាយថា ទីក្រុងវ៉ាស៊ីនតោននឹង «គ្រប់គ្រង» វ៉េណេស៊ុយអេឡា ប៉ុន្តែក្រោយមក អតីតអនុប្រធានាធិបតីរបស់លោក Maduro គឺលោកស្រី Delcy Rodriguez បានឡើងកាន់តំណែងជាមេដឹកនាំបណ្ដោះអាសន្ន ហើយបានគ្រប់គ្រងប្រទេសអាមេរិកឡាទីនមួយនេះក្រោមការត្រួតពិនិត្យរបស់សហរដ្ឋអាមេរិក៕