អ្នកនាំពាក្យរាជរដ្ឋាភិបាលកម្ពុជា បានបញ្ជាក់តាមរយៈសន្និសីទសារព័ត៌មាននៅថ្ងៃទី១ ខែមេសា ឆ្នាំ​២០២៦នេះថា រហូតមកទល់ពេលនេះ កម្លាំង​សាមគ្គី​ជាតិ​ខ្មែរ​នៅ​តែ​រក្សា​បាន​នូវ​មាន​ភាព​រឹង​មាំ​យ៉ាង​ខ្លាំង​នៅ​ជាមួយរាជរដ្ឋាភិបាល និងវីរកងទ័ពជួរមុខ​ ដើម្បីការពារអធិបតេយ្យភាព និង​បូរ​ណ​ភាព​ទឹកដី។

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែងថា រហូតមកទល់ពេលនេះ កម្លាំង​សាមគ្គី​ជាតិ​ខ្មែរ​នៅ​តែ​រក្សា​បាន​នូវ​មាន​ភាព​រឹង​មាំ​យ៉ាង​ខ្លាំង​នៅ​ជាមួយ​រាជ​រដ្ឋាភិបាល​និង​វីរ​កងទ័ព​ជួរ​មុខ ដើម្បីការពារអធិបតេយ្យភាព និងបូរណភាពទឹកដី។ ទឹកចិត្តស្នេហាជាតិ មាតុភូមិ របស់​ប្រជា​ពលរដ្ឋ​ខ្មែរនៅគ្រប់ទិសទី ទាំងក្នុងនិងក្រៅប្រទេស នៅតែមានសភាពពុះកញ្ជ្រោលខ្លាំង តែ​រក្សា​បាន​នូវភាពថ្លៃថ្នូរ និងពោរពេញដោយការ​អត់ធ្មត់​ខ្ពស់​ដើម្បី​ឈាន​ឆ្ពោះ​ទៅ​រក​ដំណោះ​ស្រាយ​ពិតប្រាកដ និ​ងយូរអង្វែងតាមគោលដៅដែលរាជរដ្ឋាភិបាលចង់បាន។

ឯកឧត្តមបន្តថា មិនមែនតែរាជរដ្ឋាភិបាលទេដែលមិនដែលភ្លេចកាតព្វកិច្ច «ការពារបូរណ​ភាព​ទឹក​ដី ​និងប្រជាជន» ប៉ុន្តែ ប្រជាពលរដ្ឋខ្មែរគ្រប់គ្នា និងគ្រប់ទិសទី ក៏រឹតតែ​សកម្ម​ខ្លាំង​ក្លា​ក្នុង​ការ​ធ្វើ​សកម្ម​ភាព​ការពារបូរណភាពទឹកដី និងឈឺឆ្អាលចំពោះជនរួមជាតិដែលជាជនភៀសសឹក ដោយ​បាន​ចូល​រួមចំណែកយ៉ាងសស្រាក់សស្រាំក្នុងសកម្មភាពមនុស្ស«ជួយគ្នាក្នុងគ្រាលំបាក»។ នេះ​​គឺ​ជា​កម្លាំង​ចលករដ៏សំខាន់មិនអាចខ្វះបាន​ដើម្បី​ជំរុញ​​ឱ្យ​មាន​លទ្ធផល​ជា​វិជ្ជមាន​ក្នុង​បុព្វ​ហេតុ​ការពារ​បូរណភាពទឹកដី និងប្រជាជន។  

សូមជម្រាបថា ក្នុង «ស្មារតីនៅជាមួយជាតិ កងកម្លាំង និងជនភៀសសឹកគ្រប់វេលា» ក្នុងឱកាស​នៃ​ពិធី​បុណ្យចូលឆ្នាំថ្មីប្រពៃណីជាតិខ្មែរ ដែលនឹងចូលមកដល់ក្នុងពេលឆាប់ៗនេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងប្រធាន​សហភាព​សហព័ន្ធ​យុវជន​កម្ពុជា​ (ស.ស.យ.ក.) រួមជាមួយប្រតិភូ មន្ត្រីរាជការ វិស័យឯកជន និងអាជ្ញាធរមូលដ្ឋាន បាន​អញ្ជើញ​ជួប​សំណេះសំណាល ចែកអំណោយ និងពិសាអាហារ​សាមគ្គី​រួមគ្នា​ជា​មួយ​បង​ប្អូន​ប្រជា​ពលរដ្ឋ​ភៀស​សឹក រួមទាំងការលេងល្បែងប្រជាប្រិយ ព្រមទាំងទស្សនាការប្រគុំតន្រ្តីស្គរដៃ និង​ការ​សម្តែង​ទស្សនីយភាពសិល្បៈ។

កម្មវិធីជួបជុំទាំងនេះ បានប្រព្រឹត្តទៅនៅតាមបណ្តាជំរំជាច្រើនសរុប ១២ទីតាំង ចាប់ពីថ្ងៃទី២៩ ដ​ល់​ថ្ងៃទី៣១ ខែមីនា ឆ្នាំ២០២៦នេះ បានចូលរួមថែរក្សា និង​អភិរ​ក្ស​ប្រពៃណី​ទំនៀម​ទម្លាប់​ពី​ដូន​តា​ផង​ និងដើម្បីជួបសំណេះសំណាលជាមួយលោកយាយលោកតា អ៊ំពូមីង បងប្អូន​ជ​ន​ភៀស​សឹក​ផង​ដែរ ក្នុងឱកាសត្រៀមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ នាពេល​ខាង​មុខ​ដ៏​ខ្លី​នេះ​ផងដែរ៕