ប្រេងបានចាប់ផ្ដើមខែថ្មីជាមួយនឹងកំណើនជាង ១% នៅថ្ងៃពុធ (១ មេសា) នេះ ដោយសន្ទស្សន៍ប្រេងឆៅ Brent បានបន្តដើរទៅមុខ បន្ទាប់ពីការកើនឡើងប្រចាំខែខ្ពស់បំផុតក្នុងខែមីនា ដោយសារភាពប្រែប្រួលនៅមជ្ឈិមបូព៌ាបានធ្វើឱ្យទីផ្សារមានភាពរង្គោះរង្គើ ទោះបីជាមានរបាយការណ៍ថា សង្គ្រាមអាមេរិក-អ៊ីស្រាអែល លើអ៊ីរ៉ង់ អាចនឹងជិតដល់ទីបញ្ចប់ក៏ដោយ។

កិច្ចសន្យាប្រេងប្រភេទ Brent សម្រាប់ខែមិថុនា បានកើនឡើង ១,៤០ ដុល្លារ ឬ ១,៤% ដល់តម្លៃ ១០៥,៣៧ ដុល្លារក្នុងមួយបារ៉ែល នៅម៉ោងសកល ០៤:៣០នាទី ព្រឹកព្រលឹមថ្ងៃពុធនេះ។ ប្រេងប្រភេទ Brent បានកត់ត្រាកំណើនប្រចាំខែចំនួន ៦៤% ក្នុងខែមីនា នេះបើយោងតាមទិន្នន័យ LSEG ដែលតាមដានសន្ទស្សន៍តម្លៃតាំងពីខែមិថុនា ឆ្នាំ១៩៨៨មក។

ទន្ទឹមនឹងនេះ សន្ទស្សន៍ប្រេងឆៅ WTI របស់អាមេរិក សម្រាប់ខែឧសភា បានកើនឡើង ១,៥៩ ដុល្លារ ឬ ១,៦% ដល់តម្លៃ ១០២,៩៧ ដុល្លារក្នុងមួយបារ៉ែល។

ប្រធានាធិបតីអាមេរិក លោក Donald Trump បានប្រាប់អ្នកយកព័ត៌មានកាលពីថ្ងៃអង្គារថា សហរដ្ឋអាមេរិក អាចបញ្ចប់យុទ្ធនាការយោធាក្នុងរយៈពេលប្រហែលពីរទៅបីសប្តាហ៍ ហើយអ៊ីរ៉ង់ មិនចាំបាច់ធ្វើកិច្ចព្រមព្រៀងដើម្បីបញ្ចប់ជម្លោះនោះទេ ដែលនេះគឺជាសេចក្តីប្រកាសដ៏ច្បាស់លាស់បំផុតរបស់លោកអំពីបំណងចង់បញ្ចប់សង្គ្រាមអាយុកាលជាងមួយខែមកនេះ។

ទោះយ៉ាងនេះក្ដី ក្រុមអ្នកវិភាគនិយាយថា ទោះបីជាជម្លោះបញ្ចប់ក៏ដោយ ការខូចខាតហេដ្ឋារចនាសម្ព័ន្ធទំនងជានឹងធ្វើឱ្យការផ្គត់ផ្គង់មានកម្រិត។ អ្នកវិភាគទីផ្សារនិយាយថា តម្លៃប្រេងនឹងអាស្រ័យលើថា តើបណ្ដាញផ្គត់ផ្គង់នឹងមានលក្ខណៈធម្មតាវិញយ៉ាងឆាប់រហ័សប៉ុនណាបន្ទាប់ចប់ជម្លោះនោះ៕