ប្រធានាធិបតីអាមេរិក លោក Donald Trump និងរដ្ឋមន្ត្រីការបរទេសរបស់លោក គឺលោក Marco Rubio បាននិយាយថា ចុងបញ្ចប់នៃសង្គ្រាមលើអ៊ីរ៉ង់ អាចនឹងខិតជិតមកដល់ហើយ ដោយទីក្រុងវ៉ាស៊ីនតោន បានបង្ហាញពីលទ្ធភាពសម្រាប់ទាំងការចរចាដោយផ្ទាល់ជាមួយថ្នាក់ដឹកនាំទីក្រុងតេអេរ៉ង់ និងការបញ្ចប់ជម្លោះ ទោះបីជាគ្មានកិច្ចព្រមព្រៀងក៏ដោយ។

ការលើកឡើងទាំងនេះបានគូសបញ្ជាក់ពីការផ្លាស់ប្ដូរ និងសេចក្តីថ្លែងការណ៍មិនទៀងទាត់ និងពេលខ្លះផ្ទុយគ្នាពីទីក្រុងវ៉ាស៊ីនតោន អំពីរបៀប និងពេលណាបញ្ចប់សង្គ្រាម ដែលឥឡូវនេះស្ថិតនៅក្នុងសប្តាហ៍ទីប្រាំរបស់ខ្លួន។ លោក Trump បានប្រាប់អ្នកយកព័ត៌មាននៅសេតវិមានកាលពីថ្ងៃអង្គារថា៖ «អាមេរិកនឹងចាកចេញឆាប់ៗនេះ» ដោយនិយាយថា ការចាកចេញអាចកើតឡើង «ក្នុងពេលប្រហែលពីរសប្តាហ៍ ឬបីសប្តាហ៍»។ លោកបន្ថែមថា «អ៊ីរ៉ង់មិនចាំបាច់ធ្វើកិច្ចព្រមព្រៀងទេ»។

លោក Rubio បាននិយាយថា មានលទ្ធភាពសម្រាប់ជំនួបរវាងភាគីទាំងពីរ «នៅចំណុចណាមួយ» ហើយអាមេរិកអាច «មើលឃើញផ្លូវបញ្ចប់»។ ពីមុន ទីក្រុងវ៉ាស៊ីនតោនបានគំរាមថា នឹងបង្កើនប្រតិបត្តិការ បើទីក្រុងតេអេរ៉ង់មិនទទួលយកក្របខណ្ឌបទឈប់បាញ់ ១៥ចំណុចរបស់អាមេរិក ដែលមានការទាមទារស្នូលថា អ៊ីរ៉ង់ត្រូវប្តេជ្ញាមិនផលិតអាវុធនុយក្លេអ៊ែរ បញ្ឈប់ការចម្រាញ់សារធាតុអ៊ុយរ៉ានីញ៉ូមទាំងអស់ ហើយបើកច្រកសមុទ្រហ័រមូសឡើងវិញទាំងស្រុង។

យ៉ាងណាក៏ដោយ ការវាយប្រហារនៅតែបន្តទៅវិញទៅមករវាងភាគីជម្លោះនៅព្រឹកថ្ងៃពុធ (១ មេសា) នេះ ដោយយានដ្រូនបានវាយប្រហារធុងប្រេងឥន្ធនៈនៅអាកាសយានដ្ឋានអន្តរជាតិកូវ៉ែត ដែលបណ្តាលឱ្យមានអគ្គិភ័យដ៏ធំមួយ ហើយអាជ្ញាធរនៅបារ៉ែន បានរាយការណ៍ពីអគ្គិភ័យនៅទីតាំងក្រុមហ៊ុនមួយ ពីការវាយប្រហាររបស់អ៊ីរ៉ង់៕