និស្សិតស៊ែរប៊ីរាប់រយនាក់ បានប៉ះទង្គិចយ៉ាងហិង្សាជាមួយនគរបាល កាលពីថ្ងៃអង្គារ (៣១ មីនា) ក្នុងអំឡុងពេលនៃបាតុកម្មប្រឆាំងនឹងការឆែកឆេររបស់នគរបាល នៅការិយាល័យសាកលវិទ្យាល័យប៊ែលក្រាដ ដែលបានបង្កឱ្យមានភាពតានតឹងរវាងអាជ្ញាធរ និងសកម្មជនប្រឆាំងរដ្ឋាភិបាល ខណៈភាពតានតឹងបែបនេះបានផ្ទុះឡើងជាប្រចាំអស់រយៈពេលជាងមួយឆ្នាំមកហើយ។

យោងតាមសាក្សីរបស់សារព័ត៌មានរ៉យទ័រ ហ្វូងមនុស្សនៅកណ្តាលទីក្រុងប៊ែលក្រាដ បានប៉ះទង្គិចគ្នាមួយសន្ទុះជាមួយមន្រ្តីនគរបាល ដែលបានប្រើដំបងដើម្បីបំបែកក្រុមបាតុករ ហើយអ្នកតវ៉ាស្រែកពាក្យជេរប្រមាថយ៉ាងខឹងសម្បារ។ នគរបាលបាននិយាយថា ការចុះឆែកឆេរនេះគឺជាផ្នែកមួយនៃការស៊ើបអង្កេតលើការស្លាប់របស់និស្សិតស្រីវ័យ ២៥ឆ្នាំម្នាក់ កាលពីថ្ងៃសុក្រសប្តាហ៍មុន បន្ទាប់ពីធ្លាក់ពីលើបង្អួចនៅក្នុងអគារមហាវិទ្យាល័យក្បែរនោះ។

ក្រោយមក សាកលវិទ្យាធិការនៃសាកលវិទ្យាល័យប៊ែលក្រាដ បានប្រាប់ហ្វូងអ្នកតវ៉ាថា នគរបាលបានចូលទៅក្នុងអគារដោយគ្មានការពន្យល់ផ្នែកច្បាប់ត្រឹមត្រូវ ដើម្បីឆែកឆេរឯកសារ ហើយបានរឹបអូសកុំព្យូទ័រជាច្រើន។ លោក Dragan Vasiljevic នាយនគរបាលស៊ែរប៊ី បាននិយាយថា មន្ត្រីទាំងនោះកំពុងធ្វើសកម្មភាពតាមដីការបស់តុលាការ នៅពេលពួកគេបានចូលទៅក្នុងការិយាល័យសាកលវិទ្យាល័យ ដើម្បីស្វែងរកភស្តុតាងទាក់ទងនឹងការស្លាប់របស់និស្សិតរូបនេះ។

ភាពតានតឹងក្នុងស្រុករបស់ប្រទេសស៊ែរប៊ី បាននិងកំពុងកើតមានអស់មួយរយៈមកហើយ។ ការតវ៉ាប្រឆាំងរដ្ឋាភិបាលបានរីករាលដាលពាសពេញប្រទេសស៊ែរប៊ី ចាប់តាំងពីខែធ្នូ ឆ្នាំ២០២៤មក ពោលគឺមួយខែបន្ទាប់ពីមនុស្ស ១៦នាក់ បានស្លាប់នៅក្នុងគ្រោះថ្នាក់បាក់រលំដំបូលស្ថានីយរថភ្លើងមួយកន្លែងក្នុងទីក្រុង Novi Sad ភាគខាងជើងស៊ែរប៊ី៕