លោកប្រធានាធិបតីអាមេរិក Donald Trump កំពុងគំរាមកំហែងដាក់ពង្រាយកងទ័ពជើងគោក ដើម្បីដណ្តើមយកហេដ្ឋារចនាសម្ព័ន្ធប្រេងសំខាន់ៗ នៅលើកោះ Kharg របស់អ៊ីរ៉ង់ ជាយុទ្ធសាស្ត្រយោធាមួយដែលអ្នកជំនាញ លើកឡើងថា នឹងធ្វើឲ្យជីវិតកងកម្លាំងអាមេរិកស្ថិតក្នុងគ្រោះថ្នាក់ ហើយទំនងនៅតែមិនអាចបញ្ចប់សង្គ្រាមនេះបាន។

អ្នកជំនាញ បាននិយាយថា ប្រសិនបើលោក Trump ចង់រាំងខ្ទប់ឧស្សាហកម្មប្រេងរបស់អ៊ីរ៉ង់ ដើម្បីមានប្រៀប ក្នុងការចរចា ជម្រើសដ៏ល្អជាងនេះ អាចជាការបិទផ្លូវនៅសមុទ្រ ចំពោះនាវា ដែលបានទៅបំពេញប្រេង នៅស្ថានីយប្រេងរបស់កោះ Kharg។

កោះដែលមានទីតាំងនៅម្ខាងទៀតនៃឈូងសមុទ្រពែរ្ស ពីមូលដ្ឋានទ័ពអាមេរិក នៅប្រទេសគុយវ៉ែត និងអារ៉ាប៊ីសាអ៊ូឌីត គឺជាបេះដូងនៃឧស្សាហកម្មប្រេងរបស់អ៊ីរ៉ង់ ដែល ៩០ភាគរយនៃការនាំចេញរបស់ខ្លួនឆ្លងកាត់ទីនេះ។ ទីតាំងនេះមានសារៈសំខាន់ណាស់ ព្រោះឆ្នេរសមុទ្ររបស់អ៊ីរ៉ង់ភាគច្រើនរាក់ពេក ដែលមិនអាចឲ្យនាវាដឹកប្រេងចូលចតបាន។

អតីតអ្នកវិភាគយោធាអាមេរិក លោក Michael Eisenstadt ដែលឥឡូវនេះដឹកនាំកម្មវិធីសិក្សាយោធា និងសន្តិសុខ នៅវិទ្យាស្ថាន Washington Institute សម្រាប់គោលនយោបាយដើមបូព៌ា បាននិយាយថា៖ «ការដាក់កងកម្លាំងថ្មើរជើង អាចជាមធ្យោបាយដាក់សម្ពាធដ៏ខ្លាំងក្លាខាងចិត្តវិទ្យា ក្នុងការវាយប្រហារអ៊ីរ៉ង់»។

 តែលោក Eisenstadt បានបញ្ជាក់ថា៖ «ម្យ៉ាងវិញទៀត អ្នកក៏កំពុងធ្វើឲ្យកងទ័ពរបស់អ្នកស្ថិតក្នុងគ្រោះថ្នាក់ដែរ។ កោះនេះនៅមិនឆ្ងាយពីដីគោកនោះទេ។ ដូច្នេះ ពួកគេ (អ៊ីរ៉ង់) អាចបង្កការបំផ្លិចបំផ្លាញជាច្រើន លើកោះនេះ ប្រសិនបើពួកគេមានបំណងចង់បង្កការខូចខាតដល់ហេដ្ឋារចនាសម្ព័ន្ធផ្ទាល់ខ្លួនរបស់ពួកគេ»។

ចំណែកលោក Danny Citrinowicz អ្នកជំនាញអ៊ីរ៉ង់នៅវិទ្យាស្ថានសិក្សាសន្តិសុខជាតិអ៊ីស្រាអែល បានលើកឡើងថា ការដណ្តើមកាន់កាប់កោះ Kharg អាចធ្វើឲ្យជម្លោះកាន់តែធ្ងន់ធ្ងរឡើងៗ។ លោកបាននិយាយថា អ៊ីរ៉ង់ និងក្រុមតំណាងរបស់ខ្លួន រួមមានទាំងក្រុមឧទ្ទាមហ៊ួធីរបស់យេម៉ែនផងដែរ អាចបង្កើនការសងសឹក ក្នុងនោះរួមទាំងការដាក់មីននៅច្រកសមុទ្រ Hormuz ឬវាយប្រហារគោលដៅដោយយានដ្រូន នៅទូទាំងឧបទ្វីបអារ៉ាប់ ចាប់ពីឈូងសមុទ្រពែរ្ស រហូតដល់សមុទ្រក្រហម។

អ្នកស្រាវជ្រាវទំនិញ និងធនាគារវិនិយោគ ព្រមានថា ការសងសឹកដ៏ធំ អាចផ្ដល់ផលវិបាករយៈពេលយូរ ចំពោះតម្លៃថាមពល និងសេដ្ឋកិច្ចពិភពលោក៕