សម្តេច ប៉ាប ឡេអូ (Pope Leo) កាលពីថ្ងៃអង្គារ (ទី៣១ ខែមីនា ឆ្នាំ២០២៦) បានជំរុញឲ្យប្រធានាធិបតីអាមេរិក លោក Donald Trump ស្វែងរក «ផ្លូវចេញ» ដើម្បីបញ្ចប់សង្គ្រាមអ៊ីរ៉ង់ ដែលជាការអំពាវនាវដោយផ្ទាល់ដ៏កម្រមួយពីសម្តេចសង្ឃកាតូលិក ខណៈដែលជម្លោះក្នុងតំបន់កំពុងរីករាលដាល។

សម្តេច Leo ដែលជាសម្តេចប៉ាបដំបូងមកពីសហរដ្ឋអាមេរិក បានមានបន្ទូលថា៖ «ខ្ញុំត្រូវបានគេប្រាប់ឲ្យដឹងថា លោកប្រធានាធិបតី Trump ថ្មីៗនេះ បាននិយាយថា លោកចង់បញ្ចប់សង្គ្រាម»។ សម្តេច ប៉ាប បានប្រាប់អ្នកសារព័ត៌មាននៅខាងក្រៅនិវេសនដ្ឋានរបស់ព្រះអង្គ នៅទីក្រុង Castel Gandolfo ជិតទីក្រុងរ៉ូម ប្រទេសអ៊ីតាលីថា៖ «សង្ឃឹមថា លោកកំពុងស្វែងរកផ្លូវចេញ។ សង្ឃឹមថា លោកកំពុងស្វែងរកមធ្យោបាយ ដើម្បីកាត់បន្ថយបរិមាណអំពើហិង្សា»។

សម្តេច ប៉ាប ដែលត្រូវបានគេស្គាល់ថា ជាបុគ្គលប្រើប្រាស់ពាក្យពេចន៍ដោយប្រុងប្រយ័ត្ន កម្រធ្វើការអំពាវនាវដោយផ្ទាល់ទៅកាន់មេដឹកនាំជាតិណាស់ ប៉ុន្តែព្រះអង្គបានបង្កើនការរិះគន់ ចំពោះសង្គ្រាមអ៊ីរ៉ង់ ក្នុងរយៈពេលប៉ុន្មានសប្តាហ៍ថ្មីៗនេះ។

ជាក់ស្ដែង កាលថ្ងៃទី២៩ ខែមីនា ជាការកត់សម្គាល់ដ៏ខ្លាំងខុសពីធម្មតា សម្តេច ប៉ាប បានមានបន្ទូលថា ព្រះជាម្ចាស់បដិសេធការអធិដ្ឋានរបស់បណ្ដាមេដឹកនាំដែលចាប់ផ្តើមសង្គ្រាម និងមាន «ដៃប្រឡាក់ដោយឈាម»។

គួរបញ្ជាក់ថា ជម្លោះអ៊ីរ៉ង់រយៈពេល ១ខែ ដែលបានចាប់ផ្តើមដោយការវាយប្រហារតាមអាកាសរួមគ្នា រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់ កាលពីថ្ងៃទី២៨ ខែកុម្ភៈ បានរីករាលដាលពាសពេញតំបន់ ដោយបានសម្លាប់មនុស្សរាប់ពាន់នាក់ រំខានដល់ការផ្គត់ផ្គង់ថាមពល និងគំរាមកំហែងធ្វើឲ្យសេដ្ឋកិច្ចពិភពលោកធ្លាក់ចុះ៕