ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយថា សហរដ្ឋអាមេរិក មិនមានគម្រោងធ្វើឲ្យការដឹកជញ្ជូនទំនិញនៅច្រកសមុទ្រហ័រមូស មានប្រក្រតីភាពឡើងវិញទេ។

លោកបានប្រាប់អ្នកយកព័ត៌មាននៅសេតវិមានថា៖ «យើងនឹងចាកចេញឆាប់ៗនេះ។ ហើយប្រសិនបើបារាំង ឬប្រទេសផ្សេងទៀត ចង់បានប្រេង ឬឧស្ម័ន ពួកគេ នឹងត្រូវឆ្លងកាត់តាមច្រកសមុទ្រហ័រមូស ហើយពួកគេនឹងអាចការពារខ្លួនឯងបាន។ តាមពិតទៅ ខ្ញុំគិតថា វានឹងមានសុវត្ថិភាពណាស់ ប៉ុន្តែយើងមិនមានអ្វីពាក់ព័ន្ធនឹងរឿងនោះទេ»។ 

លោក ត្រាំ បានបន្ថែមថា៖«អ្វីដែលកើតឡើងនៅក្នុងច្រកសមុទ្រ យើងនឹងមិនមានអ្វីពាក់ព័ន្ធនឹងច្រក   សមុទ្រនេះទេ ពីព្រោះប្រទេសទាំងនេះ ដូចជាចិន នឹងឆ្លងកាត់ ហើយពួកគេនឹងដាក់ប្រេងចូលនៅក្នុង នាវាដ៏ស្រស់ស្អាតរបស់ពួកគេ ហើយពួកគេនឹងចាកចេញ ហើយពួកគេ នឹងថែរក្សាខ្លួនឯង។ គ្មានហេតុផលណាមួយសម្រាប់យើងពាក់ព័ន្ធនឹងកិច្ចការនេះទេ»។  

សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងធំៗរបស់អ៊ីរ៉ង់ រួមទាំងទីក្រុងតេអេរ៉ង់ ត្រូវបានវាយប្រហារ។ កងឆ្មាំបដិវត្តន៍ឥស្លាមអ៊ីរ៉ង់ (IRGC) បានបើកការវាយប្រហារសងសឹកប្រឆាំងនឹងអ៊ីស្រាអែល និងមូលដ្ឋានយោធាអាមេរិកនៅក្នុងប្រទេសបារ៉ែន ហ្ស៊កដានី អ៊ីរ៉ាក់ កាតា គូវ៉ែត អេមីរ៉ាតអារ៉ាប់រួម និងអារ៉ាប៊ីសាអ៊ូឌីត។

អាជ្ញាធរអ៊ីរ៉ង់ក៏បានសម្រេចចិត្តបិទច្រកសមុទ្រហ័រមូសចំពោះនាវាដែលមានទំនាក់ទំនងជាមួយសហរដ្ឋអាមេរិក អ៊ីស្រាអែល និងប្រទេសដែលគាំទ្រការឈ្លានពានប្រឆាំងនឹងសាធារណរដ្ឋឥស្លាមនេះ។ ក្នុងអំឡុងពេលជម្លោះ នាវាដឹកប្រេងជាច្រើនគ្រឿង ត្រូវបានវាយប្រហារ ដោយសារតែឆ្លងកាត់ច្រកសមុទ្រនេះ ដោយគ្មានការអនុញ្ញាតពីទីក្រុងតេអេរ៉ង់។ នៅថ្ងៃទី ២៥ ខែមីនា រដ្ឋមន្ត្រីការបរទេសលោក Abbas Araghchi បានប្រកាសថា អ៊ីរ៉ង់បានអនុញ្ញាតឲ្យប្រទេសជាមិត្ត រួមទាំងរុស្ស៊ី ឥណ្ឌា អ៊ីរ៉ាក់ ចិន និងប៉ាគីស្ថាន ឆ្លងកាត់ច្រកសមុទ្រហ័រមូស៕