យានដ្រូនអ៊ីរ៉ង់បានវាយប្រហារសឺទែនប្រេងនៅអាកាសយានដ្ឋានអន្តរជាតិគូវ៉ែត បណ្តាលឲ្យកើតមានអគ្គិភ័យយ៉ាងធំ ហើយក្រុមអាជ្ញាធរនៅប្រទេសបារ៉ែន បានរាយការណ៍ថា អគ្គិភ័យបានកើតមានផងដែរនៅទីតាំងក្រុមហ៊ុនមិនបញ្ចេញឈ្មោះមួយកន្លែង ស្របពេលដែលសង្រ្គាមរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ ឈានចូលដល់សប្តាហ៍ទី ៥ ។

លោក Abdullah al-Rajhi គឺជាអ្នកនាំពាក្យអគ្គនាយកដ្ឋានអាកាសចរណ៍ស៊ីវិលគូវ៉ែត និយាយនៅថ្ងៃពុធនេះថា អាកាសយានដ្ឋានបានក្លាយជាគោលដៅវាយប្រហារយានដ្រូនពីអ៊ីរ៉ង់ និងក្រុមប្រដាប់អាវុធដែលពួកគេគាំទ្រ ។

លោក al-Rajhi និយាយប្រាប់ទីភ្នាក់ងារព័ត៌មាន KUNA របស់គូវ៉ែតថា ការវាយឆ្មក់នេះ មានគោលដៅលើសឺទែនប្រេងនៅអាកាសយានដ្ឋាន ជាហេតុនាំឲ្យមានអគ្គិភ័យកើតឡើងនៅទីនោះ ។

លោកថា ក្រុមជួយសង្រ្គោះបន្ទាន់ បាននៅកន្លែងកើតហេតុ ហើយការខូចខាតគឺជាសម្ភារៈ ដោយគ្មានមនុស្សរងរបួសនោះទេ ។

ខណៈពេលនោះដែរ ក្រសួងមហាផ្ទៃបារ៉ែននិយាយថា ក្រុមការងារជនស៊ីវិល កំពុងព្យាយាមពន្លត់អគ្គិភ័យនៅទីតាំងមួយកន្លែងរបស់ក្រុមហ៊ុន ដោយសារតែការឈ្លានពានរបស់អ៊ីរ៉ង់ ។

ដោយឡែក នៅក្នុងប្រទេសអារ៉ាប់រួម ទីភ្នាក់ងារព័ត៌មានផ្លូវការ WAM រាយការណ៍ថា បំណែកពីការបាញ់ស្កាត់យានដ្រូនធ្លាក់លើកសិដ្ឋានមួយកន្លែងស្ថិតក្នុងតំបន់ al-Rifaa ទីក្រុង Fujairah បានសម្លាប់បុរសជនជាតិបង់ក្លាដែសម្នាក់ ៕