​វាយ​កូន​បាល់៖ កីឡាករ​វាយ​កូន​បាល់​រុស្ស៊ី Daniil Medvedev បាន​ខកខាន​ត្រឡប់​ឡើងឈរ​លេខ ១ ពិភពលោក​វិញ​ក្រោយ​រង​បរាជ័យ​ក្រោម​ស្នាដៃ​កីឡាករ​ប៉ូឡូញ Hubert Hurkacz នៅ​ការប្រកួត​កម្មវិធី ATP Miami Open នៅ​សហរដ្ឋអាមេរិក​។

​​កីឡាករ​វ័យ ២៦ឆ្នាំ Medvedev ត្រូវការ​ឡើងដល់​វគ្គ​ពាក់កណ្តាល​ផ្តាច់ព្រ័ត្រ​ដើម្បី​យក​តំណែង​លេខ ១ ពី Novak Djokovic វិញ​តែ​បែ​ជា​បរាជ័យ ៧-៦(៩-៧) និង ៦-៣ ក្រោម​ស្នាដៃ​កីឡាករ​លំដាប់​លេខ ៨ Hurkacz ត្រឹម​វគ្គ ៨នាក់​ចុងក្រោយ​។​ ​​កីឡាករ​វ័យ ២៥ឆ្នាំ Hubert Hurkacz ដែល​ធ្លាប់​ឈ្នះ Roger Federer នៅ Wimbledon វគ្គ ៨នាក់​ចុងក្រោយ​ឆ្នាំ​មុននឹង​បន្ត​ជួប​ជាមួយ​កីឡាករ​អេ​ស្ប៉ា​ញ Carlos Alcaraz ដែល​បាន​យកឈ្នះ​កីឡាករ​ស៊ែ​ប Miomir Kecmanovic​។ ​​រំលឹកថា​ កាលពី​ខែកុម្ភៈ Medvedev បាន​ក្លាយជា​កីឡា​ករទី២៧ ដែល​ឡើង​មកឈរ​លេខ ១ ពិភពលោក​របស់ ATP Ranking តែ​គ្រប់គ្រង​តំណែង​នេះ​បាន​ត្រឹម ៣សប្តាហ៍​ប៉ុណ្ណោះ​។ ​​ដោយឡែក​ងាក​មក​ការប្រកួត​ផ្នែក​នារី​នៅ Miami Open នេះ​ផងដែរ កីឡាការិនី​ជប៉ុន Naomi Osaka បាន​វាយបក​ពីក្រោយ​យកឈ្នះ​ម្ចាស់​មេដាយមាស​អូឡាំពិក​ទីក្រុង​តូ​ក្យូ​កីឡាការិនី​ស្វ៊ី​ស Belinda Bencic ដើម្បី​ឡើង​វគ្គ​ផ្តាច់ព្រ័ត្រ​។

​​Belinda Bencic បាន​យកឈ្នះ​សិត​ដំបូង ៦-៤ ទៅហើយ​តែអតីត​កីឡាការិនី​លេខ ១ ពិភពលោក Osaka ក៏​វាយបក​យកឈ្នះ​ពីរ​សិត​ផ្ទួនៗ​វិញ ៦-៣ និង ៦-៤ យកឈ្នះ​ការប្រកួត​ដែល​ចំណាយពេល​ដល់​ទៅ ២ម៉ោង ៦នាទី​។ ​​សូមបញ្ជាក់ថា Naomi Osaka ធ្លាប់​ឈ្នះ​ជើងឯក Grand Slam បួន​លើក​រួមមាន Australian Open នៅ​ឆ្នាំ២០១៩ និង ២០២១ រួមជាមួយ​នឹង US Open ឆ្នាំ២០១៨ និង ២០២០ តែ​បាន​ធ្លាក់​ដល់​ចំណាត់ថ្នាក់​លេខ ៧៧ ពិភពលោក​បន្ទាប់ពី​មិនបាន​ចូលរួម​ការប្រកួត​ណាមួយ​សោះ​តាំងពី​ឆ្នាំ២០២១៕

​អត្ថបទ​៖​នាង សុភា​វុ​ធ