រដ្ឋអាជ្ញាបារាំង កំពុងស្វែងរកការចោទប្រកាន់ពីបទភេរវកម្ម ប្រឆាំងនឹងមនុស្សពេញវ័យម្នាក់ និងក្មេងជំទង់ ៣រូបដែលមានអាយុ ចន្លោះពី ១៦ ទៅ ១៧ឆ្នាំ ជុំវិញគម្រោងវាយប្រហារដោយបំផ្ទុះគ្រាប់បែក តែត្រូវបានបំផ្លាញ នៅជិតការិយាល័យធនាគារ Bank of America (BoA) ក្នុងទីក្រុងប៉ារីស ប្រទេសបារាំង ដែលត្រូវបានគេមើលឃើញថា ទំនងជាការសងសឹក ដោយសារសង្គ្រាមជាមួយអ៊ីរ៉ង់។

អង្គភាពប្រឆាំងភេរវកម្មជាតិ PNAT នៅថ្ងៃពុធ (ទី១ ខែមេសា ឆ្នាំ២០២៦) នេះ បានឲ្យដឹងថា ខ្លួនកំពុងស្វែងរកការចោទប្រកាន់ប្រឆាំងនឹងមនុស្សទាំង ៤រូប បន្ទាប់ពីបានបង្កើតចៅក្រមស៊ើបអង្កេតដែលមានសិទ្ធិអំណាចស៊ើបអង្កេតកាន់តែទូលំទូលាយ ដើម្បីដំណើរការសំណុំរឿងនេះ។

PNAT បានឲ្យដឹងនៅក្នុងសេចក្តីថ្លែងការណ៍របស់ខ្លួនថា ជនទាំង ៤រូប ត្រូវបានសង្ស័យថា បានឃុបឃិតធ្វើភេរវកម្ម ផលិតឧបករណ៍ផ្ទុះ ឬឧបករណ៍បង្កចំហេះ និងប៉ុនប៉ងបំផ្លាញ ដោយមានជាប់ទាក់ទងនឹងសកម្មភាពភេរវកម្ម។

ជនសង្ស័យ ត្រូវបានសួរចម្លើយទាំងអស់ ខណៈស្ថិតនៅក្នុងឃុំខ្លួនរបស់នគរបាល។ បុគ្គលទី៥ ត្រូវបានដោះលែងដោយសារមិនមានភស្តុតាងគ្រប់គ្រាន់។

អាជ្ញាធរបារាំងកំពុងពិនិត្យមើលទំនាក់ទំនងដែលអាចកើតមាន ជាមួយវីដេអូឃោសនាគាំទ្រអ៊ីរ៉ង់ដែលចេញផ្សាយកាលពីសប្តាហ៍មុន ដោយក្រុមមួយដែលមានឈ្មោះថា HAYI ឬ «Harakat Ashab al-Yamin al-Islamiyya» ដែលបានអំពាវនាវឲ្យមានការសងសឹកផ្តោតលើផលប្រយោជន៍របស់សហគមន៍ជ្វីហ្វនៅអឺរ៉ុប និងបានលើកឡើងជាពិសេស អំពីទីស្នាក់ការកណ្តាលរបស់ BoA នៅប្រទេសបារាំង។

គួរបញ្ជាក់ថា គ្រាប់បែកនេះត្រូវបានដាក់ដោយអនីតិជន ២នាក់ នៅមុខការិយាល័យធនាគារ នៅលើផ្លូវ Rue de la Boétie ក្នុងសង្កាត់ទី៨ នៃទីក្រុងប៉ារីស ចន្លោះម៉ោង ៣ព្រឹក និង ៤ព្រឹក (ម៉ោងក្នុងស្រុក) នាថ្ងៃទី២៨ ខែមីនា៕